Փաստ ինֆո

Խորհրդարանում մնալն ինքնանպատակ չէ: Աժ-ում մենք գտնվում ենք մեր քաղաքացիների տված ձայների արդյունքում, որ մեր ուժերի ներածի չափով թույլ չտանք այս իշխանություններին հակապետական, հակահայկական որոշում կայացնել։ Այս մասին հայտարարել է «Պատիվ ունեմ» խմբակցության ղեկավար, «Հայրենիք» կուսակցության նախագահ Արթուր Վանեցյանը՝ parliamentmonitoring.am-ին տված հարցազրույցում։

Ընդդիմադիր գործիչը նկատել է, որ այս խորհրդարանը սա սովորական գումարում չէ: Սա, ցավոք, կապիտուլյացիայից հետո ձևավորված խորհրդարան է: «Ընդդիմությունը ԱԺ եկել է մեկ օրակարգով՝ գործող իշխանությանը դուրս շպրտել իր պաշտոններից, որովհետև նրանց իշխանության ամեն օրը սպառնալիք է մեր երկրի ապագայի, անվտանգության, պետության գոյության համար»,- նշել է Ա. Վանեցյանը:

Խոսելով օրենսդրական նախաձեռնությունների մասին՝ ընդդիմադիր խմբակցության ղեկավարը հիշեցրել է, որ «Պատիվ ունեմ»-ը «Հայաստան» խմբակցության հետ միասին առաջարկել էր ստեղծել Արցախի հարցով մշտական հանձնաժողով: Մեծամասնությունը այդ առաջարկը մերժել է, ինչն անհասկանալի է: «Գործող իշխանությունը պետք է օգտվի ընդդիմության նման առաջարկներից ու աշխարհին ցույց տա, որ երկրի ներսում կա Արցախի հարցի կարգավորման պահանջ՝ ըստ այն կարգավորումների, որոնք 30 տարի եղել են ԵԱՀԿ Մինսկի խմբի շրջանակում: Մեզ պատճառաբանեցին, որ կա Հայաստան-Արցախ միջխորհրդարանական բարեկամական խումբ, և այդ խմբի շրջանակում բոլոր հարցերի պատասխանները կստանանք, բացի այդ, Արցախի հարցը լինելու է մեր գերակայությունը, և Արցախին վերաբերող բոլոր հարցերը քննարկվելու են համապատասխան հանձնաժողովներում»,- ասել է նա ու ավելացրել, որ անցած 6 ամիսների ընթացքում չենք ունեցել Հայաստան-Արցախ հանձնաժողովի գեթ մեկ նիստ, ընդհակառակը, տեսել ենք, որ Արցախի նկատմամբ ուշադրությունը ոչ միայն խորհրդարանի, այլև ողջ կառավարության մակարդակով նվազել է:

«Արցախ մեկնելը ադրբեջանցիները մշտապես շահարկում են, ասում են, որ Հայաստանի իշխանությունն իրավունք չունի մեկնել Արցախ, և մեր իշխանությունը որևէ կերպ չի հակադարձում ադրբեջանցիների այդ հոխորտանքներին: Երկրորդ նախաձեռնությունը վերաբերել է զինծառայողներին, նրանց արտոնություններ տալուն: Մեր պատգամավոր Թագուհի Թովմասյանը հանդես է եկել օրենսդրական նախաձեռնությամբ, որ զինծառայողները բուժհաստատություններում սպասարկվեն արտահերթ, որովհետև եթե զինվորականը հեռավոր տեղերից գալիս է Երևան, նրան հերթագրում են, և այդ հերթերը շատ երկար են տևում: Այդ նախաձեռնությունը ևս մերժվեց, բայց եղավ զարհուրելի մի փաստ: Մի քանի օր հետո նույն ճշգրտությամբ այդ նախաձեռնությամբ հանդես եկավ իշխող խմբակցությունից Հայկ Սարգսյանը, ինչը ԱԺ պաշտպանության և անվտանգության հարցերի հանձնաժողովում հավանության արժանացավ»,- հայտարարել է պատգամավորը:

Լրագրողի այն դիտարկմանը, որ «ուզում եք ասել, որ յուրացրի՞ն ձեր նախաձեռնությունը»՝ Ա.Վանեցյանը նշել է. «Կարող ենք այդպես էլ ձևակերպենք: Հայկ Սարգսյանն ասել է, թե ինքը տեղյակ չի եղել, որ նման նախաձեռնություն է եղել, բայց թույլ տվեք չհավատալ այդ հայտարարությանը»:

Ա. Վանեցյանը չի բացառել նաեւ որոշակի փուլում մանդատներից հրաժարվելը, սակայն նկատել, որ այդ դեպքում սահմանադրական ճգնաժամ չի ստեղծվի։

«Խորհրդարանում մնալն ինքնանպատակ չէ: Աժ-ում մենք գտնվում ենք մեր քաղաքացիների տված ձայների արդյունքում: Եղել են ընտրություններ, ձևավորվել է խորհրդարան: Մենք այստեղ եկել ենք փողոցային պայքարից հետո: Իհարկե, չէինք սպասում ընտրություններից այսպիսի արդյունքներ, բայց ունենք այն, ինչ ունենք, և պետք է ԱԺ-ում կարողանանք օգտագործել մեր լիազորությունները, մեր խնդիրները բարձրաձայնենք միջազգային ատյաններում: Իշխող խմբակցությունը, մեղմ ասած, ոչ միշտ է պաշտպանում Հայաստանի ու Արցախի շահերը, ոչ միշտ է ազնիվ լինում միջազգային գործընկերների հետ: Մենք այստեղ ենք, որ մեր ուժերի ներածի չափով թույլ չտանք այս իշխանություններին հակապետական, հակահայկական որոշում կայացնել: Եթե հասունանա պահը, որ հասկանանք՝ այլևս ԱԺ-ում անելիք չունենք, հավատացեք, կդնենք մանդատները և կգնանք: Եթե ընդդիմությունը մանդատները վայր դնի, սահմանադրական ճգնաժամ չի ստեղծվելու, փոխարենը իշխանությունն ազատ գործելու հնարավորություն կստանա խորհրդարանում»,- հայտարարել է նա:

Աղբյուր` Փաստինֆո