Փաստ ինֆո

ԱԺ-ն քննարկում է «Քաղաքացիական պայմանագիր» խմբակցության պատգամավոր Վիլեն Գաբրիելյանի ներկայացրած օրենքի նախագիծը, որի նպատակն է վերահսկել ԱԺ հանձնաժողովների նախագահի և նախագահի տեղակալի ընտրության հարցը:

Նախագծով փոփոխություն է առաջարկվում «ԱԺ կանոնակարգ» սահմանադրական օրենքում, ըստ որի՝ եթե մշտական հանձնաժողովի նախագահի տեղակալը չի ընտրվում, ապա իրավասու խմբակցությունը քվեարկությունից հետո 5 աշխատանքային օրվա ընթացքում առաջադրում է նոր թեկնածու:

Նշենք, որ ՔՊ-ն ամեն կերպ ցանկանում է վերահսկել մասնավորապես ԱԺ պաշտպանության և անվտանգության հարցերի հանձնաժողովի փոխնախագահի ընտրությունը, որի համար «Հայաստան» խմբակցությունն առաջադրել է Արթուր Ղազինյանի թեկնածությունը, սակայն ՔՊ-ն 16 անգամ չի ընտրել նրան հանձնաժողովի նախագահի տեղակալի պաշտոնում։

Վիլեն Գաբիրելյանը ԱԺ-ում նախագիծը ներկայացրեց, որ գործող օրենքն ունի մի շարք բացեր և պարզբանեց.

«Մասնավորապես 8-րդ գումարման ԱԺ-ի պաշտպանության և անվտանգության հարցերի մշտական հանձնաժողովը չի կարողանում ընտրել նախագահի տեղակալ: Իրավասու խմբակցությունն անընդհատ առաջադրում է նույն թեկնածուին, հանձնաժողովի մեծամասնությունը թեկնածուին չի կարողանում ընտրել, և կանոնակարգը տվյալ խնդիրը չի կարգավորում:

Ըստ այդմ՝ առաջանում է իրավունքի բախում, մասնավորապես՝ իրավասու խմբակցությանը օրենքով ամրագրված թեկնածու առաջադրելու իրավունքը և պատգամավորին Սահմանադրությամբ ամրագրված ազատ ընտրության իրավունքը»,-ասաց ՔՊ-ական պատգամավորը:

Ըստ ՔՊ-ական պատգամավորի՝ «Հայաստան» խմբակցությունը, բազմիցս նույն թեկնածուին առաջադրելով, օգտվելով օրենքի բացից, փորձ է անում ստիպել պատգամավորներին պարտադրված ընտրություն կատարել:

Վիլեն Գաբիրելյանը նաև պնդեց, թե նախագծով սահմանափակում չի դրել Արթուր Ղազինյանի թեկնածության վրա. «Նոր թեկնածուն նշանակվում է հաջորդ առաջադրման համար, այսինքն եթե մի անգամ չի ընտրվել, մյուս անգամ ուրիշ մարդ է առաջադրվում, ևս չի ընտրվում, կարծում եմ, պրն. Ղազինյանի հնարավորությունն այս տեսանկյունից բաց է՝ հանդիսանալու նոր թեկնածու»,- ասաց նա:

Աղբյուր` Փաստինֆո