Փաստ ինֆո

Ադրբեջանն իր զինված ուժերի մոդեռնիզացիան, սպառազինության ներկրման փաստը օգտագործում է ՀՀ-ի վրա ճնշումներ գործադրելու և մեզանից նոր զիջումներ ստանալու համար,- այս մասին խորհրդարանում հայտարարեց ԱԺ «Պատիվ ունեմ» խմբակցության պատգամավոր Տիգրան Աբրահամյանը։

Ըստ պատգամավորի՝ այդ քաղաքականությունը բաց է, երկրի նախագահը նույնիսկ ուղիղ խոսում է դրա մասին։ Փաստացի, խնդիրը ոչ միայն այն է, որ Ադրբեջանն ամեն կերպ փորձում է կանխել ՀՀ ԶՈՒ-երի արդիականացումը, այլև այն, որ ՀՀ իշխանություններն ականջալուր են լինում այդ հորդորներին և այս իրավիճակում մեր ԶՈՒ-երը շարունակում են գտնվել այնպիսի վիճակում, որը չի բավարարում ՀՀ քաղաքացիներին։

Անդրադառնալով ՊԲ-ում տեղի ունեցող փոփոխություններին, պատգամավորը նշեց, որ մեկ-երկու քայլով առաջ են այն վիճակից, որն ունենք այսօր Հայաստանում։ Անկախ թերություններից, հնարավոր է եղել հետպատերազմական շոկը հաղթահարել, ստեղծել նվազագույն պայմաններ, ինչը հնարավորություն կտա հետագայում վերափոխումների գործընթաց սկսել։

«Բավականին ակտիվ գործընթաց է գնում նաև տեղում ինքնակազմակերպվելու առումով»։

Ըստ Աբրահամյանի, սա առաջին փուլի համար բավարար է, բայց ևս երեք փուլ կա, իրական ռեֆորմների միջոցով պետք է փորձ արվի ստեղծել առողջ մարմին, որը հնարավորություն կտա ապահովել արցախցիների անվտանագությունը։

«Այսօր անվտանգության ապահովումը Արցախում երկաստիճան է։ Մի մասով ապահովում են ռուս խաղաղապահները, մյուս մասով՝ իրականացնում է ՊԲ-ն և ուժային կառույցները, բայց առանց ՊԲ-ի գոյության, Արցախի հայկականությունը որևէ ձևով երաշխավորված չէ»։

ՀՀ ԶՈՒ-երում բարեփոխումներին անդրադառնալով, Աբրահամյանը նշեց, որ խնդիրը միայն բյուջեում չէ, այլ այն, որ երկիրը ղեկավարում են մարդիկ, որոնք նպատակային ձևով ԶՈՒ-երը տանում են կազմալուծման։

«Ռազմաքաղաքական իշխանության բուրգի վերևում ներկայացված են մարդիկ, որոնք նույնիսկ ցանկության դեպքում ի վիճակի չեն Հայաստանը դուրս բերել այս վիճակից»,- ասաց Աբրահամյանը։

Աղբյուր` Փաստինֆո