Փաստ ինֆո

Անկանխիկ գործառնություններն ընդհանրապես վատ բան չեն, քաղաքակիրթ աշխարհը գնում է այդ ուղղությամբ, սակայն հետաքրքիր է, որ, օրինակ, նախագիծն այս ամբիոնից ներկայացնող Ներսես Երիցյանն անձնապես իր ֆինանսական միջոցներն ի՞նչ եղանակով է պահում: Այս մասին խորհրդարանում «Անկանխիկ գործառնությունների մասին» օրենքի նախագծի քննարկման ժամանակ հայտարարեց «Հայաստան» խմբակցության պատգամավոր Արեգնազ Մանուկյանը:

Նա նշեց, որ 2020 թվականի պաշտոնատար անձանց եկամուտների հայտարարագրում Կենտրոնական բանկի նախագահի տեղակալ Ներսես Երիցյանի ներկայացրած տվյալներն են՝ կանխիկ միջոցները 350 հազար դոլար, անկանխիկ միջոցները՝ 11 միլիոն դրամ, կամ մոտ 20 հազար դոլար:

Պատգամավորի խոսքով՝ զավեշտ է, երբ մարդը, որն ԱԺ ամբիոնից անկանխիկ դրամական միջոցների քարոզ է իրականացնում, իր ֆինանսական միջոցնեը պահում է կանխիկ եղանակ:

«Փաստորեն, անկանխիկ գործառնությունների ավելի լավ հակաքարոզ պարզապես հնարավոր չէր իրականացնել։ Ինձ նաև հետաքրքիր է պատճառը՝ ինչո՞ւ է Ներսես Երիցյանը իր ֆինանսական միջոցները պահում կանխիկ եղանակով, արդյոք բանկային համակարգի ներկայացուցիչ լինելով՝ չի վստահում բանկային համակարգին, թե՞ այստեղ այլ հարց կա, օրինակ, փողերի լվացման հարցը, ինչպես նշեց ՔՊ-ական պատգամավորներից մեկը՝ ավելացնելով, որ կանխիկով գումարի ծագումն հայտնի չի լինում։ Հիմա թե սրանցից ո՞ր մեկն է, թող իրենք իրար մեջ պարզեն», - ասաց Արեգնազ Մանուկյանը

Աղբյուր` Փաստինֆո