Փաստ ինֆո

Անկախությունից ի վեր Հայաստանում սահմաններին լարվածություն է եղել։ Մենք խաղաղ պայմաններում հազարավոր զոհեր ենք ունեցել 90-ականներից սկսած։ Կարծում եմ՝ այն խաղաղության օրակարգը, որը մենք հիմա առաջ ենք մղում, հենց միտված է նրան, որ կարողանանք սահմանների և Հայաստանի անվտանգությունն ապահովել, որպեսզի այլևս խաղաղ պայմաններում զինվորներ չզոհվեն և Հայաստանը պատերազմում չհայտնվի: ԱԺ-ում լրագրողների հետ զրույցում հայտարարել է ԱԺ փոխնախագահ Հակոբ Արշակյանը:

Ինչ վերաբերվում է հայ և թուրք բանագնացների հանդիպմանը, Հակոբ Արշակյանն ասաց, որ դա ընդամենը առաջին հանդիպումն էր, ուստի նորմալ է, որ շատ ինֆորմացիա չկա։

Իսկ թե հայկական կողմն ի՞նչ օրակարգով է գնում այդ հանդիպումներին, Արշակյանն ասաց, որ Թուրքիայի հետ խոսելու իրենց օրակարգը չի փոխվել.

«Անկախ Հայաստանի բոլոր իշխանությունները հայտարարել են, որ այդ օրակարգը հետևյալն է՝ որ առանց նախապայմանների Թուրքիայի հետ սահմանները պետք է բացվեն և հաստատվեն նորմալ դիվանագիտական հարաբերություններ: Սա է մեր օրակարգը և այն չի փոխվել»,-պատասխանեց ԱԺ փոխնախագահը:

Դիտարկմանը, որ հայ-թուրքական հարաբերությունների կարգավորման նախորդ բոլոր դեպքերում գործընթացը վիժեցվել է Թուրքիայի կողմից, որը առաջ է քաշել իր հայտնի նախապայմանները, Հակոբ Արշակյանն ասաց, որ հիմա էլ նման ռիսկ կա.

«Հույս ունենք, որ միջազգային գործընկերների օգնությամբ կկարողանանք դիվանագիտական հարաբերություններ հաստատելու և սահմանների բացման հարցերը լուծել, սա բխում է Հայաստանի շահերից »,-ասաց Արշակյանը:

Հարցին՝ որևէ պայմանավորվածություն ձեռք բերվե՞լ է երկու երկների ներկայացուցիչների հանդիպման ընթացքում, Հակոբ Արշակյանն ասաց. «Առաջին հանդիպումն է տեղի ունեցել, մարդիկ ծանոթացել են, մեր կողմը իր օրակարգն է առաջ բերել, թուրքական կողմն էլ իր օրակարգն է առաջ բերել։ Տեղի է ունեցել քննարկում, որից հետո կողմերը գնացել են իրենց մայրաքաղաքներ՝ քննարկելու այդ օրակարգային հարցերը»։

Աղբյուր` Փաստինֆո