Փաստ ինֆո

Ամուր նյարդերի մասին խոսող իշխանությունը խիստ դյուրագրգիռ վիճակում է հայտնվում ընդդիմության հարցադրումներից։ Այս մասին լրագրողների հետ ճեպազրույցում ասաց «Հայաստան» խմբակցության պատգամավոր Ագնեսա Խամոյանը՝ անդրադառնալով ԱԺ-ում ընդդիմադիր պատգամավորների և Ռուբեն Ռուբինյանի վիճաբանությանը:

Նա հիշեցրեց Նիկոլ Փաշինյանի հայտարարությունը, որ կարևոր գործընթացներ են տեղի ունենում երկրում, և պետք են ամուր նյարդեր.
«Այս պայմաններում, երբ իշխանությունը խոսում է ամուր նյարդերի մասին, ընդդիմությունը փորձում է հասկանալ, թե, ի վերջո, ի՞նչ բանակցություններ են տեղի ունեցել Հայաստանի և Թուրքիայի հատուկ ներկայացուցիչների միջև։ Առավոտից փորձում ենք դրա պատասխանն ստանալ։ Ես ԱԺ-ում հայտարարեցի, որ ամբիոնից խոսք է հնչել Ռուբեն Ռուբինյանի՝ Թուրքիայի ազդեցության գործակալ լինելու մասին։ Իշխանափոխությունից անմիջապես առաջ Ռուբեն Ռուբինյանը Թուրքիայում ուսումնառության էր անցել: Այս կասկածներից հետո, նա նշանակվում է Հայաստանի հատուկ ներկայացուցիչ, հիմա կարող չէ՞ ողջամիտ կասկած լինել՝ ինչո՞ւ Ռուբինյանը նշանակվեց։ Սա հարցադրումներից մեկն էր, որ փորձում էինք հասկանալ»,-ասաց Ագնեսա Խամոյանը։
Պատգամավորը հայտարարեց, որ իշխանությունները շատ կարևոր գործընթաց են թաքցնում հայ հանրությունից, իսկ իրենք հասնելու են նրան, որ ի վերջո պարզաբանվի՝ ի՞նչ են բանակցել Ռուբինյանը և թուրք բանագնացը:

Ագնեսա Խամոյանը հիշեցրեց նաև, որ Ադրբեջանի նախագահի հետ հանդիպումներից հետո Նիկոլ Փաշինյանը հայտարարում էր, որ Ալիևը կառուցողական է, կիրթ է, սակայն դրանից հետո եղավ պատերազմը, Արցախի կորուստ, հազարավոր զոհեր:

Ըստ պատգամավորի՝ հիմա երկրորդ արարի ականատեսն ենք լինում, երբ կառուցողական մթնոլորտի վերաբերյալ ձևակերպումները կիրառվում են Հայաստանի և Թուրքիայի հատուկ ներկայացուցիչների հանդիպման դեպքում:

Աղբյուր` Փաստինֆո