Փաստ ինֆո

Իշխանության ներկայացուցիչները, երբ գործուղումների ընթացքում լինում են միայնակ, նրանք ներկայացնում են միայն իրենց տեսակետը, այսինքն՝ այլ տեսակետ մեր երկրից միջազգային կառույցներում չի ներկայացվում։ Դա իրենց ազատ գործելու իրավունք է տալիս։ Հետո մենք զարմանում ենք, թե ինչու՞ միջազգային կառույցներից չունենք արձագանքներ Հայաստանում տիրող իրավիճակի մասին, ինչու՞ ընդդիմության կողմից Հայաստանի ներսում բարձրացվող հարցերի մասին տեղեկացված չեն մեր միջազգային գործընկերները։ Այս մասին ճեպազրույցում ասաց «Պատիվ ունեմ» խմբակցության ղեկավար Արթուր Վանեցյանը՝ պարզաբանելով, թե ինչու՞ էր համաձայնել իշխանության ներկայացուցիչների հետ գործուղման մեկնել ԱՄՆ։

Լրագրողի հարցին՝ ինչպե՞ս էր պատրաստվում այս իշխանության հետ ճանապարահ գնալ, Արթուր Վանեցյանն արձագանքեց.

«Ես իշխանության հետ ճանապարհ չեմ գնում: Ես ԱԺ պատգամավոր եմ, որն ունի լիազորություններ, պարտականություններ և պատասխանատվություն իր ընտրողի առջև։ Կարծում եմ, ընդդիմության ընտրողների ձայնը պետք է լսելի դարձնել միջազգային հարթակներում»,-հայտարարեց, որ պետք է ցանկացած հնարավորության դեպքում միջազգային հարթակներում ներկայացնել իշխանությունների գործողությունները, որոնք ուղիղ վնաս են հասցնում ժողովրդավարությանը և մեր երկրի արտաքին քաղաքականությունը:

Նա նկատեց, որ մարդիկ այսօր հարց են տալիս՝ ինչո՞ւ նախկինում միջազգային կառույցներն ակտիվորեն արձագանքում էին Հայաստանում կատարվող գործընթացներին, խնդիրներին, իսկ այսօր համատարած լռություն է. «Ընդդիմությունը պետք է խոսի դրա մասին, բարձրաձայնի խնդիրների մասին։ Մենք չպետք է հրաժարվենք միջազգային հարթակներում մեր պարտականություններն ու լիազորությունները կատարելուց»,-ասաց «Պատիվ ունեմ» խմբակցության ղեկավար Արթուր Վանեցյանը:

Ի դեպ, Արթուր Վանեցյանը հայտարարել է, որ  ԱԺ պատվիրակության կազմում ԱՄՆ գործուղման մեկնելու իր  ծախսերը պատրաստվում էր ինքը հոգալ:

Ինչ վերաբերվում է «Հայաստան» խմբակցության պատգամավորների որոշմանը, որոնք բոյկոտել են գործուղումների մեկնելը, մինչև որոշ պատգամավորների նկատմամբ երկրից դուրս սահմանափակումները չվերացվեն, Արթուր Վանեցյանն ասաց.

«Սա խայտառակություն է, ընտրված պատգամավորները զրկված են ազատ տեղաշարժի իրավունքից, ընդ որում՝ բոլորս ականատես ենք եղել, որ դա եղել է բացառապես շինծու քրեական գործերով»:

Արթուր Վանեցյանը հայտարարեց, որ բավարարված չէ ընդդիմության աշխատանքով.

«Սխալներ եմ տեսնում թե՛ անձամբ իմ, թե՛ ընդդիմադիր մյուս գործընկերների գործողություններում, բայց պետք է անենք ամեն ինչ, որ այս իշխանություններին հեռացնենք»,-ասաց նա:

Արթուր Վանեցյանն ասաց, որ բազմիցս հայտարարել են, որ գործող իշխանությունները ի վիճակի չեն ապահովել Հայաստանի անվտանգությունը:

Աղբյուր` Փաստինֆո