Փաստ ինֆո

Փարաքարում խմբակցությունների միջև կոնսենսուսի բացակայության միակ հիմնավորումն այն էր, որ ի սկզբանե իշխանության կողմից կար հստակ դիրքրոշում, որ միայն իրենց երկու թեկնածուներից մեկը պետք է լինի համայնքի ղեկավար: Այս մասին լրագրողների հետ զրույցում ասաց «Ապրելու երկիր» կուսակցության համահիմնադիր Մեսրոպ Առաքելյանը:

Հիշեցնենք, որ հունվարի 7-ին Փարաքարի ավագանու երեք խմբակցություններ ՝ «Ապրելու երկիրը», ՔՊ-ն և «Դավիթ Մինասյան» դաշինքը հայտարարեցին, որ առաջիկա հինգ տարիների ընթացքում Փարաքարում համատեղ կառավարում կիրականցնեն, սակայն խմբակցություններն այդպես էլ համաձայնության չեկան, իսկ համատեղ կառավարում կիրականացնեն «Դավիթ Մինասյան» դաշինքը և ՔՊ-ն:

Մեսրոպ Առաքելյանի խոսքով՝ իշխանությունն ի սկզբանե ունեցել է հստակ դիրքորոշում, որ բացառում է քննարկել՝ ո՞վ է լինելու համայնքի ղեկավարը՝ բացի իրենց թեկնածուից.

« Հունվարի 7-ի նիստի ողջ ընթացքում փորձել ենք քննարկել համայնքապետի ընտրության հարցը, սակայն նրանց դիրքորոշումը հստակ է եղել, որ միայն իրենք պետք է լինեն իշխանություն»,-ասաց Առաքելյանը:

Դիտարկմանը, որ «Ապրելու երկիր» կուսակցությանը հասարակությունը չի ընկալում որպես ընդդիմադիր ուժ, Մեսրոպ Առաքելյանն ասաց, որ դա միայն մամուլի ընկալումն է.

«Հայաստանում ընդդիմադիր լինելու միակ չափանիշը միմյանց հայհոյախառն արտահայտություններ ասելն է, եթե մենք հայհոյախառն, վիրավորական խոսքեր չենք ասում իշխանություններին, որից հասարակությունն արդեն հոգնել է, դա չի նշանակում՝ընդդիմադիր չենք: Հասարակությունը հոգնել է այն մթնոլորտից, որ կա այսօրվա քաղաքական դաշտում, հասարակությունն ուզում է իր կյանքում ինչ-որ բան փոխվի: Մենք համայնքներում մասնակցում ենք ընտրություններին, որտեղ կառավարում ենք ստանձնել, փորձելու ենք այդ համայնքներում աշխատել, քանի որ փոխադարձ մեղադրանքներ ասելու գործընթացն այլ քաղաքական ուժեր շատ լավ իրականացնում են՝ թե՛ ընդդիմությունից, թեւ իշխանությունից: Մենք չենք պատրաստվում դրանով զբաղվել »,-ասաց Մեսրոպ Առաքելյանը:

Աղբյուր` Փաստինֆո