Փաստ ինֆո

Գեղարքունիքի Վարդենիս համայնքի նախկին ղեկավարը՝ ՔՊ-ի հովանու ներքո, պարալիզացրել է համայնքապետարանի աշխատանքը, ողջ համայնքը կաթվածահար է:

«Փաստինֆո»-ին Գեղամասար համայնքի ղեկավար Հակոբ Ավետյանը պատմեց, որ Վարդենիսի նախկին ղեկավար Արամ Մելքոնյանը նորընտիր համայնքապետին չի վերադարձնում Վարդենիսի համայնքապետի աշխատասենյակի բանալին և կնիքը, ինչի հետևանքով ավագանին չի կարողանում անցնել իր բնականոն աշխատանքին, նորընտիր համայնքապետ Ահարոն Խաչատրյանն էլ չի կարողանում կատարել իր աշխատանքային պարտականությունները.

«Չեն թողնում համայնքապետին, որ իր աշխատասենյակ մտնի, ոչ էլ ավագանիներն են թողնում: Ավագանու անդրանիկ նիստից հետո, երբ համայնքի ղեկավար ընտրվեց Ահարոն Խաչատրյանը, Արամ Մելքոնյանը հենց այդ օրը պարտավոր էր հանձնել աշխատասենյակի բանալիները և կնիքը, բայց այդ օրվանից չի տալիս: Լավ՝ ընդունենք համայնքապետին են ուզում խանգարել, բայց ավագանիներին պարտավոր են թույլ տալ, ինչպե՞ս են խոչընդոտում ավագանու աշխատանքը»,-ասաց Ավետյանը և նշեց, որ ամբողջ Վարդենիսը, նախկին համայնքապետի անձնական ամբիցիաների պատճառով, կաթվածահար է.

«Մի ողջ համայնք իրենց անձնական «պրինցիպների» պատճառով չի կարողանում գործարք կատարել: Ոչ կարողանում ենք բյուջե հաստատել, ոչինչ չենք կարողանում անել, կոմունալների հարց կա, վաղը էլեկտրոցանցից կարող են գալ ու հոսանք անջատել»,-ասաց Գեղամասարի ղեկավարը:

Հակոբ Ավետյանը վստահ է, որ այս ամենի հետևում կանգնած է ՏԿԵ նախարար Գնել Սանոսյանը.

«Գնել Սանոսյանի հովանու ներքո է այս ամեն ինչը: Արամի ու Գնելի կազմակերպած խուլիգանությունն է: Այս ամենը անմիջապես Գնել Սանոսյանի հանձնարարությամբ է, եթե մնար Արամ Մելքոնյանին, ինքը շուտվանից կհանձներ ու կգնար իր գործին, սա Գնել Սանոսյանի անձնական պրինցիպն է»,-ասաց Հակոբ Ավետյանը:

ՔՊ-ն դիմել է դատարան՝ չեղյալ համարելու ավագանու անդրանիկ նիստը, որի ժամանակ համայնքապետ էր ընտրվել ընդդիմության թեկնածուն՝ Ահարոն Խաչատրյանը, Հակոբ Ավետյանն ասաց, որ սպասում են դատարանի վճռին, որից հետո կորոշեն՝ ինչ քայլերի կդիմեն:

«Մարդ, եթե հպարտություն կամ ինքնասիրություն ունի, իր պարտությունը պետք է հպարտորեն ընդունի, մտածի, որ մասնակցել և պարտվել է, շնորհավորի հաղթողին, եթե ես լինեի, ես հաստատ կշնորհավորեի ընտրված թեկնածուին, իմ աջակցությունն էլ կհայտնեի: Ընտրությունը պետք չէ անձնական թշնամանք դարձնել»,-ասաց նա:

Հիշեցնենք, որ դեկտեմբերի 5-ին տեղի ունեցած ՏԻՄ ընտրությունների արդյունքներով՝ Վարդենիս խոշորացված համայնքում «Քաղաքացիական պայմանագիր» կուսակցությունը ստացել էր 12 մանդատ, «Ահարոն Խաչատրյան» կուսակցությունների դաշինքը 10 մանդատ, իսկ «Միասնական Վարդենիս» կուսակցությունների դաշինքը՝ 5: Ելնելով ընտրության արդյունքներից՝ «Ահարոն Խաչատրյան» կուսակցությունների դաշինքը և «Միասնական Վարդենիս» կուսակցությունների դաշինքը համագործակցության և համայնքում տեղական իշխանության մարմինները միասնաբար ձևավորելու մասին հայտարարություն էին ստորագրել:

Դեկտեմբերի 30-ի Վարդենիսի ավագանու անդրանիկ նիստի ժամանակ, թեև ՔՊ-ն ամեն կերպ փորձում էր խոչընդոտել համայնքապետի ընտրությանը, բայց ընդդիմադիր «Միասնական Վարդենիս» և «Ահարոն Խաչատրյան» խմբակցությունների 14 անդամները՝ 14 կողմ, զրո դեմ, զրո անվավեր ձայներով համայնքի ղեկավար ընտրեցին Ահարոն Խաչատրյանին:

Աղբյուր` Փաստինֆո