Փաստ ինֆո

Քաղաքական գործիչները պետք է զրկված լինեն ընթացիկ քրեական գործի վերաբերյալ դատողություն անելու հնարավորությունից։ Այս մասին ԱԺ-ում ասաց Հանրային պաշտպանի գրասենյակի ղեկավարի տեղակալ Արմինե Ֆանյանը՝ ընդգծելով, որ դա պետք է ամրագրվի օրենսդրությամբ։ 

Ֆանյանը նախ արձանագրեց, որ ունենք կալանավորումը որպես խափանման միջոց կիրառելու ինստիտուտի սխալ ընկալում, հատկապես՝ զգայունություն ունեցող գործերով հասարակության ցանկությունը՝ մարդուն տեսնել անազատության մեջ, խիստ կաշկանդում է դատարաններին։

Նրա խոսքով՝ բազմաթիվ անգամներ տեսել ենք ճնշումներ, որոնք ուղղակիորեն չեն կարող չազդել դատարանների կողմից այդ միջնորդությունները բավարարելու, ինչպես նաև՝ վարույթ իրականացնող մարմինների կողմից կալանավորման միջնորդություններ ներկայացնելուն։

Բացի այդ՝ փաստաբանն ուշադրություն հրավիրեց ԲԴԽ-ում դատավորներին կարգապահական պատասխանատվության ենթարկելու վերաբերյալ միջնորդությունների քննությանը և այն հանգամանքին, որ հիմնականում այդ վարույթները վերաբերել են դատավորի կողմից կալանավորումը որպես խափանման միջոց ընտրելու միջնորդությունները մերժելուն և մտահոգիչ է, որ հետապնդումը սկսվում է մարդու իրավունքներին նպաստող որոշում կայացնելու առնչությամբ։

Ֆանյանը նաև մտահոգություն հայտնեց, որ գրավի այլընտրանքը, որն արդեն վերածվել է այլընտրանքային խափանման միջոցի, ցույց է տալիս, որ իրավապահ մարմինները չեն ցանկանում որևէ կերպ նվազեցնել կալանավորումների միջնորդությունների քանակը։

Նրա խոսքով՝ շոշափելի խնդիր է նաև այս կամ այն քաղաքական գործիչների՝ դեռևս քրեական գործի քննության փուլում հրապարակավ կատարված հայտարարությունները։ Շատ դեպքերի ենք ականատես եղել, որ տարբեր քաղաքական ուժեր դեռևս մինչդատական վարույթում հրապարակային կարծիքներ են արտահայտում, պնդումներ են կատարում մեղադրական բնույթի և դրան զուգահեռ կալանավորման միջնորդություններ են ներկայացվում։

«Իհարկե սա չի կարող ուղղակիորեն չազդել դատարանի վրա։ Ես հպարտորեն կարող եմ ասել, որ ունենք դատավորներ, որոնց վրա սա կարող է ազդեցություն չունենալ և իրենք հավատարիմ են մնալու իրենց կոչմանը, բայց դեպքերի մեծամասնությամբ, վստահաբար կարող եմ ասել, որ սա այն գործոնն է, որը կարող է ազդեցություն ունենալ»,- նշեց նա՝ ընդգծելով, որ պետք է քաղաքական գործիչների զսպվածությունը ամրագրված լինի օրենսդրությամբ, քանի որ նման հայտարարություններն ուղղակի ճնշում են դատավորների նկատմամբ։

Աղբյուր` Փաստինֆո