Փաստ ինֆո

Գլխավոր դատախազության ավագ դատախազ Կարեն Ամիրյանը խորհրդարանում ծավալված հանրային քննարկմանը հայտնել է, թե խափանման միջոց կալանքը չի վերածվել պատժամիջոցի։ Լրագրողները դատախազից հետաքրքրվեցին՝ արդյոք այդպես է կարծում՝ հիշեցնելով օրինակ՝ Գորիսի քաղաքապետ Առուշ Առուշանյանի կալանավորմումը, որը պաշտպանների կարծիքով՝ քաղաքական հետապնդում է։ Դատախազը լրագրողներին խնդրեց կոնկրետ դեպքերի մասին օրինակներ չբերել։

«Կխնդրեմ առարկայական գործերի վերաբերյալ հարցադրումներ չհնչեցնեք, որովհետև դրանցով հսկողություն իրականացնող դատախազը ես չեմ և կան գործի առանձնահատկություններ, ցանկացած գործ հենց դրանով է առանձնահատուկ՝ իր փաստական տվալներով տարբերվում է մեկ այլ գործից։ Այդ տեսանկունից որևէ գնահատական հնարավոր չէ տալ այս պահին նշված գործի շրջանակում՝ նշված հարցադրումների մասին, բայց եթե ընդհանրական ասեմ՝ այս պահի դրությամբ դատախազությունը ձեռնարկում է օրենքով իրեն տված բոլոր միջոցառումներն ու գործընթացները՝ օրինականության դաշտում, այդ թվում նաև կալանքի հետ կապված հարցերը իրացնելու շրջանակներում»։

Դատախազը նշեց, որ քննարկման ժամանակ իր պատասխանները ընդհանրական էին, կոնկրետ գործի չէին վերաբերվում։ Լրագրողները պնդեցին՝ խոսքը վերաբերում է աղմկահարոււյց գործերին, քաղաքացիները բողոքի ակցիաներով դատախազությունից անգամ պահանջել են օբյեկտիվություն ցուցաբերել։ 

«Դատախազության դիրքորոշումը հստակ է և դիրքորոշումն այն է, ինչ այս պահին ունենք։ Որևէ մեկին համամամիտ չլինելը, չի նշանակում, որ դատախազությունը գործում է ոչ իրավաչափ»,-ասաց Գլխավոր դատախազության ավագ դատախազը՝պնդելով, որ կոնկրետ դեպքով հարկավոր է դիմել գործը քննող դատախազին, որ կարող է փաստակված պատասխանել մատնանշված  հարցերին։

Կարեն Ամիրյանն ընդգծեց, որ դատախազությունում հարյուրավոր գործեր են քննվում, իսկ հանրային հնչեղություն ունեցող տասնյակ գործեր կան, հետևաբար օբյեկտիվորեն չի կարող տիրապետել նշված քրեական գործերի ամբողջ ծավալին։ Հորդորեց կոնկրետ գործով հետաքրքրող հարցերը գրավոր ծանուցմամբ ուղղել տվյալ գործը քննող դատախազին կամ գերատեսչության մամլո ծառայությյանը։ Միևնույն ժամանակ դատախազը շեշտեց, որ ընդհանրական պատասխանները պետք չէ դիտարկել, որպես խուսափողական պատասխան։ Անդրադառնալով Փարաքարում կայացած ընտրություններին, լրագրողները հետաքրքրվեցին՝ ինչ քայլեր են արվել։

«Ես անձամբ տեղեկություն չունեմ, որովհետև դա իմ լիազորությունների մեջ չի մտնում, գործընթացից տեղյակ եմ որպես քաղաքացի, բայց որպես դատախազության ներկայացուցիչ, այս պահին տվյալներ չունեմ, բայց վստահաբար որևէ գործընթաց տեղի ունեցած կլինի»։

Դատալեքս կայքի առնչությամբ խնդիրների մասին ևս խոսք գնաց։ Լրագրողները հետաքրքրվեցին՝ գուցե փորձ է արվում գործե՞ր կոծկել, ընդհանրապես համակարգից հանել։

«Բնականաբար որևէ մեկին չի կարող չմտահոգել ամբողջ դատական համակարգի սերվերների, կամ համակարգիչների առգրավված լինելը, դրանով փորձաքննություն նշանակված լինելը։ Դա բնական է՝ կա հանրային շահ, որ բոլոր գործերը մակագրվեն օրենքով սահմանաված հիմնական կանոնին համահունչ, բայց դրա մասով չմանրամասնեմ քննվում է քրեական գործ, դատախազոթյունը գտնում է, որ հնարավորինս արագ, հնարավորինս ողջամիտ սահմաններում, որքանով դա չի վնասի գործի լրիվ, օբյեկտիվ, բազմակողմանի քննությանը, պետք է այդ գործի նախաքննությունը ավարտվի, հանրությունը պետք է տեղեկացվի այն ծավալով, որքանով չի խախտի նախաքննական գաղտնիքի սկզբունքը։ Մենք՝ դատախազությունը, փորձում ենք օր առաջ որոշակի արդյունքներ ունենանք»,- ասաց դատախազը։

Աղբյուր` Փաստինֆո