Փաստ ինֆո

Ադրբեջանի զինված ուժերը սողացող պատերազմով դեմարկացիա են իրականացնում։ Առաջ են գալիս, հասնում մեր դիրքերին և ասում՝ դրանք իրենցն են։ Սահմանին սպասելի են նոր սրացումներ, ընդհուպ նոր էսկալացիա։ «Փաստինֆո»-ի հետ զրույցի ժամանակ ասաց ռազմական փորձագետ Վան Համբարձումյանը։

Նրա խոսքով՝ Ադրբեջանի համար ստեղծվել են բարենպաստ պայմաններ, որ շարունակի հարվածել Հայաստանին։ Հասարակությունը ռազմաքաղաքական ղեկավարությանը չի վստահում, ՀՀ պաշտպանության նախարարը ոլորտից հեռու է, ինչն էլ բարենպաստ է թշնամի պետության համար։

«Աշխարհում լրջագույն զարգացումներ են՝ Հյուսիսային Կորեայից մինչև Ղազախստան։ Ամբողջ աշխարհի ուշադրությունը հիմա Հայաստանը, Արցախը չեն, և ադրբեջանցիներն էլ սրանից օգտվում են։ Ուզում են Հայաստանից առավելագույնը պոկեն։ Վերջին պատերազմում Հայաստանի զինված ուժերն այնպիսի կորուստներ են կրել, որ մարտունակության մասին խոսք գնալ չի կարող։ Բացի այդ լրջագույն արտագաղթ կա, մասնավորապես այն մարդկանց շրջանում, որոնք բանակի տարիքի երեխա ունեն։ Շատ պայմանագրայիններ էլ հիասթափված դուրս են գալիս ծառայությունից, և այս ամենը ստեղծում է բարենպաստ պայմաններ»,-ասաց Վան Համբարձումյանը՝ հավելելով, որ նախ ուզում են Հայաստանից պոկեն Զանգեզուրի միջանցքը։

Փորձագետը նշում է, որ ադրբեջանցիներն ուզում են հնարավորինս առաջանան, ինչը կոչվում է սողացող պատերազմ։ Թշնամին արդեն իսկ առանց լայնամասշտաբ պատերազմական գործողությունների բավականին առաջ է եկել, և այս պահի դրությամբ փորձագետի խոսքով Հայաստանից զգալի տարածք օկուպացրել են։

Վան Համբարձումյանը կարծում է, որ կան բոլոր հիմքերը սահմանային սրացումներ, այդ թվում նաև տեղային բնույթի պատերազմ սպասելու։ Դիրքային պատերազմ հիմա էլ ընթանում է, ընդ որում հիմա ավելի լուրջ զինատեսակներ են կիրառում։

«Զինատեսակները, որոնք կիրառում են, խոսում են այն մասին, որ նրանք պատրաստվում են իրավիճակի լուրջ սրացման։ Հայաստանի քաղաքացիները պետք է ամեն վայրկյան պատրաստ լինեն դրան։ Սահմանային այս սադրանքների միջոցով փորձելու են ճնշումներ գործադրել Հայաստանի ռազմաքաղաքական ղեկավարության վրա, ինչպես նաև քաղաքացիների վրա։ Հասարակության աչքը պատերազմից վախեցած է։ Ադրբեջանցիներն էլ սահմանային պարբերական սրացումներով ճնշում են նրանց, որ եթե հանկարծ Նիկոլ Փաշինյանն ինչ-որ փաստաթուղթ ստորագրի, չհամարձակվեն դուրս գալ փողոց ու դրա դեմ պայքարեն»,-նշեց փորձագետը։

Վան Համբարձումյանի խոսքով Ադրբեջանի ռազմավարությունը կայանում է նրանում, որ Սյունիքը հայաթափեն, և բոլոր ճանապարհները վերցնեն իրենց հսկողության ներքո։

Փորձագետը նկատում է՝ Ադրբեջանն իր բանակը զինել և շարունակում է զինել լավագույն զինտեխնիկայով, մինչդեռ Հայաստանում իշխանությունները զբաղված են միայն պարգևավճարներ բաժանելով։ Նրա գնահատմամբ Հայաստանի զինված ուժերն այլևս չեն հասնի Ադրբեջանի զինված ուժերին, հետևաբար Հայաստանը պետք է այլընտրանքային պաշտպանական համակարգ գտնի, որը ՌԴ-ի հետ համագործակցությունն է։

«Հայաստանի իշխանությունները կա՛մ պետք է իրենց հակառուսական գործելաոճը վերանայեն, կա՛մ պետք է իշխանությունը փոխվի և գա այնպիսի իշխանությունը, որը հասկանում է՝ Հայաստանն այնպիսի աշխարհագրական դիրք ունի, որ Ռուսաստանի հետ չհամագործակցելու տարբերակ չունի»,-հավելեց Վան Համբարձումյանը։

Աղբյուր` Փաստինֆո