Փաստ ինֆո

Փարաքարի համայնքապետարանում այսօր տեղի ունեցավ նորընտիր համայնքապետ Դավիթ Մինասյանի երդման արարողությունը: Երդման արարողությունից առաջ ներկաները մեկ րոպե լռությամբ հարգեցին 44-օրյա պատերազմում զոհված զինվորների հիշատակը, որից հետո համայնքապետն ընթերցեց երդման տեքստը.

«Ստանձնելով ՀՀ Արմավիրի մարզի Փարաքար համայնքի ղեկավարի պաշտոնը՝ երդվում եմ՝ համայնքի ղեկավարի լիազորություններն իրականացնելիս պահպանել ՀՀ Սահմանադրությունը, օրենքները, համայնքի ավագանու որոշումները, ազնվորեն, բարեխղճորեն կատարել համայնքի ղեկավարի լիազորությունները, ծառայել համայնքի բարգավաճմանը, գործել ի բարօրություն նրա բնակիչների:

Պարտավորվում եմ պահպանել համայնքի իրավունքները, օրինական շահերը և սեփականությունը, ուժերիս անմնացորդ նվիրումով սատարել ժողովրդի հավատին, նպաստել նրա նյութական ու հոգևոր վերելքին»:

Հիշեցնենք, որ ՏԻՄ ընտրությունների արդյունքում Փարաքար համայնքում «Ապրելու երկիր» կուսակցությունը 21 հոգանոց ավագանիում ստացել է 10 մանդատ եւ 10 ձայնով իրենց թեկնածուն՝ Վոլոդյա Գրիգորյանը ընտրվել է համայնքի ղեկավար: Ավագանու մնացած 11 անդամներն էլ համայնքապետ էին ընտրել «Դավիթ Մինասյան» դաշինքի թեկնածու Դավիթ Մինասյանին։

Դեկտեմբերի 23-ին «Ապրելու երկիր» կուսակցության աջակիցները հավաքվել էին Փարաքարի մշակույթի տան բակում, որտեղ պետք է տեղի ունենար իրենց թեկնածուի երդմնակալությունը, սակայն ոստիկանները նրանց թույլ չէին տվել մտնել շենք, և երդմնակալությունը դրսում էր կազմակերպվել: «Դավիթ Մինասյան» դաշինքը դատարան հայց էր ներկայացրել՝ ընտրությունների արդյունքները անվավեր ճանաչելու պահանջով: Վարչական դատարանը որոշում էր կայացրել անվավեր ճանաչել Փարաքար համայնքի ղեկավարի ընտրությունների արդյունքները:

Հունվարի 9-ի ավագանու նիստում «Դավիթ Մինասյան» դաշինքի առաջին համար Դավիթ Մինասյանը ընտրվեց Փարաքար խոշորացված համայնքի ղեկավար: Հայտարարվեց, որ Փարաքարում առաջին 2,5 տարում համայնքապետ կլինի Դավիթ Մինասյանը, իսկ հաջորդ 2,5 տարին՝ Լյուդվիգ Գյուլնազարյանը` ՔՊ-ի թեկնածուն:

«Ապրելու երկիր» խմբակցության ամդամները վայր էին դրել մանդատները:

Աղբյուր` Փաստինֆո