Փաստ ինֆո

Ադրբեջանի կառավարության հովանու տակ գտնվող լրատվամիջոցները հակառուսական տրամադրություններ են զարգացնում՝ Ղազախստանում իրավիճակի կայունացման գործում ՀԱՊԿ-ի ձեռնարկած գործողությունների համատեքստում։

Ղազախստանի նախագահ Կասիմ-Ժոմարտ Տոկաևը երկրում տեղի ունեցող իրավիճակը համարել է պետական հեղաշրջման փորձ։ Դեռևս հունվարի 8-ին պետական դավաճանության մեղադրանքով ձերբակալվել էր Քարիմ Մասիմովը ՝ Ղազախստանի ազգային անվտանգության կոմիտեի նախկին ղեկավարը։ Մինչ այդ պաշտոնը զբաղեցնելը Մասիմովը ղեկավարում էր նախագահ Նազարբաևի վարչակազմը։

Ադրբեջանը պաշտոնապես միայն այսօր անդրադարձավ Ղազախստանում տեղի ունեցող իրադարձություններին։ Երկրի ԱԳ ղեկավարը ցավակցական խոսք է հղել Ղազախստանում տեղի ունեցածի հետևանքով զոհերի հարազատներին։ Այսօր էլ երկրի իշխանությունների կողմից ֆինանսավորվող ադրբեջանական ԶԼՄ-ներից մեկը՝ Հաքին. ազ-ն անդրադարձել է Ղազախստանում լարվածություններին ու հակառուսական քարոզչություն իրականացրել։

Լրատվամիջոցը ենթադրել է, որ հենց Մասիմովին կդարձնեն Ղազախստանում ջարդերի գլխավոր պատասխանատուն ՝ ներկայացնելով որպես այն ստվերային ֆիգուրը, որը գաղտնի զինել և ուղղորդել է մարդկանց դեպի ոստիկանություն, խանութներ, վարչական շենքեր։

Ադրբեջանը կարծես չի հավատում հնչող այն հայտարարություններին, թե դավադրության իրականացման գործում ԱԱԾ նախկին ղեկավարին օգնել են արտասահմանյան ուժեր։ Ադրբեջանական ԶԼՄ-ն հայտնում է նաև, որ բնակչության դժգոհության զանգվածային պոռթկումը փորձել են իրենց օգտին օգտագործել տարբեր «էլիտար» խաղացողներ։

Ադրբեջանական կայքի վերլուծությամբ, հենց նախագահն է հաղթել մյուսներին, և ոչ այնքան Մասիմովին, որքան Նազարբաևին։ «Չէ որ հենց ազգի առաջնորդն է շարունակել ակտիվորեն կառավարել երկիրը ՝ չնայած իշխանությունից ֆորմալ հեռանալուն»։ Ադրբեջանցի լրագրողի կարծիքով՝ Ղազախստանի նախագահը ներկայիս սուր քաղաքական ճգնաժամն օգտագործել էր որպես փաստացի երկիշխանությանը վերջ տալու հնարավորություն ու հասել նրան, որ Նազարբաևը հրաժարական տա ԱԽ քարտուղարի պաշտոնից։

«Ըստ էության, պետական հեղաշրջումն իսկապես տեղի է ունեցել։ Տոկաևը ՝ փորձելով տիրանալ իրավիճակին, երբ սպառնալիքը ներկայացնում էին ոչ այնքան փողոցներում գտնվող մարդիկ, որքան սեփական ուժայինների կասկածելի լոյալությունը, օգնության համար դիմել է Վլադիմիր Պուտինին, և նա չի մերժել»,- գրել է կայքը ու հավելել, որ Պուտինը, ով ինքն է գտնվում ազգային առաջնորդի կարգավիճակում, որը, ըստ ադրբեջանական կողմի՝ կորցրել է ժողովրդական աջակցությունը, չի կարող թույլ տալ, որ «ծերունի, հեռացիր» կոչերը բացահայտ աջակցության արժանանան Տոկաևի կողմից։

Ադրբեջանցիները հեգնանքով են նշում, թե ՀԱՊԿ-ի շրջանակներում ձևավորվում է «ահաբեկչության դեմ պայքարի» միասնական դաշինք, որը չի թույլատրի հասարակական դժգոհություն, քաղաքական ակտիվություն և նույնիսկ ընդդիմության ցանկացած դրսեւորում այն պետություններում, որոնք լավ կյանքից չեն անցել այդ միավորմանը: Սա ասում է Ադրբեջանը, որտեղ տիրում է բացարձակ բռնապետություն։

Պրոպագանդայով զբաղվող կայքը գրել է, թե դեռ ոչ վաղ անցյալում, Վլադիմիր Պուտինը երազում էր այն մասին, թե ինչպես Ռուսաստանը իր հետևից կտանի հզոր երկիրներին, որոնք մարտահրավեր կնետեին Արևմուտքին, սակայն ծաղրանքով գրել են, թե հիմա ծիծաղելի է հիշել Կրեմլի այդ ծրագրերի մասին։

«Չինաստանն ինչ-որ տեղ կգնա Ռուսաստանի հետևից։ Այժմ մնում է բավարարվել «լուզերների» ակումբում առաջատարությամբ ՝ Տաջիկստան, Հայաստան, Ղըրղզստան, Բելառուս, եւ  տարածաշրջանային առաջնորդության հավակնություններն ու երազանքները  կորցրած Ղազախստան։ Նրանք իրար կփրկեն «պետական հեղաշրջումներից»։ Ի դեպ, դա բոլորովին չի բացառում, որ ՀԱՊԿ-ը կարող է փորձել ընդլայնել «ահաբեկչության դեմ պայքարի տարածքը» այլ տարածքների հաշվին։ Լուկաշենկոն թափանցիկ ակնարկ է արել Ուզբեկստանի հասցեին»,- գրել է կայքը։

Աղբյուր` Փաստինֆո