Փաստ ինֆո

ՀՀ ԱԺ պետական-իրավական հարցերի մշտական հանձնաժողովի ընթացքում վիճաբանություն տեղի ունեցավ «Քաղաքացիական պայմանագիր» խմբակցության պատգամավոր Վիգեն Խաչատրյանի և «Հայաստան» խմբակցության պատգամավոր Ագնեսա Խամոյանի միջև.

«Մենք ստացել ենք «սերժական» և «ռոբական» ընդդիմություն, որի նպատակն է տապալել խորհրդարանի աշխատանքը: Ակնհայտ է, որ այս մարդիկ չեն հավատում, որ ԱԺ գործող մեծամասնությունը կարող է ինչ-որ լավ բան անել, դա իրենց իրավունքն է: Իմ իրավունքն է չմասնակցել այդ տապալմանը և հնարավորինս մեղմացնել այն վնասը, որ այս մարդիկ են հասցնում մեր հասարակությանը և պետությանը» ,-ասաց ՔՊ-ականը:

Վիգեն Խաչատրյանին ընդհատեց Ագնեսա Խամոյանը, ինչին արձագանքեց ՔՊ-ական պատգամավորը.

«Սա ձեր հաղորդումը չի, ես ձեզ չեմ վճարել, ինձ մի՛ սպասարկեք»,-Ագնեսա Խամոյանին ասաց Վիգեն Խաչատրյանը:
Պատգամավորների միջև լեզվակռվի պատճառով հանձնաժողովի նախագահ Վլադիմիր Վարդանյանը ստիպված եղավ նիստն ընդմիջել։

Ընդմիջումից հետո Վարդանյանը հայտարարեց, թե բոլորն էլ ցանկանում են, որ Ազգային ժողովում լինի որոշակի բարեկրթության մակարդակ։

«Նիստն ընդմիջելու համար ներողություն եմ խնդրում բոլոր այն անձանցից, որոնք հետևում էին այս նիստին, բայց հանձնաժողովի նախագահն այլ լծակ չունի, նիստից հանձնաժողովի անդամին հեռացնելը, իմ կարծիքով, լավագույն լուծումը չէ ու ընդմիջումն է դառնում այն միջոցը, որով հնարավոր է լինում վերականգնել նիստի բնականոն ընթացքը»,-ասաց Վարդանյանը։

Աղբյուր` Փաստինֆո