Փաստ ինֆո

ՀՀ երկրորդ նախագահ Ռոբերտ Քոչարյանն ընդդեմ Նիկոլ Փաշինյանի գործով նախագահող դատավոր Սերգեյ Սահակյանին բացարկի միջնորդություն է ներկայացվել։ Ռոբերտ Քոչարյանի փաստաբան Հայկ Ալումյանը հայտնեց, որ դեռևս նախորդ դատական նիստին բացարկի միջնորդություն է ներկայացվել՝ հիմքում դնելով այն հանգամանքը, որ գործը դատավորին մակագրվել է դատարանի նախագահի կողմից, ոչ թե՝ օրենքով սահմանված էլեկտրոնային մակագրմամբ, որը սակայն մերժվել է։ Դատական նիստին, որը Փաշինյանի ներկայացուցչի պնդմամբ, չի տեսանկարահանվել, քննարկվել է նաև Փաշինյանի ներկայացուցչի լիազորագրի ընդունման-չընդունման հարցը, քանի որ լիազորագիրը, ըստ Ալումյանի, ներկայացվել է ակնհայտ խախտմամբ, ինչն էլ հիմք է հանդիսացել բացարկի նոր միջնորդություն ներկայացնելու համար։ 

«Դատավորն ամեն ինչի գնաց, այդ թվում՝ օրենքի աղավաղման, որ արդարացնի լիազորագրի բովանդակությունը։ Համարում ենք, որ եթե դատավորն այն աստիճանի է կաշկանդված վարչապետից, որ ակնհայտ խախտմամբ տրված լիազորագիրն ընդունում ՝ աղավաղելով օրենքը, ապա ինքը չի կարող այս գործով օբյեկտիվ ձևով որոշում կայացնել »,- նշեց Ալումյանը՝ հավելելով, որ այս գործով շատ ավելու լուրջ հարց է քննարկվում, քան՝ լիազորագրի ընդունման հարցը, այն է՝ Նիկոլ Փաշինյանի կողմից զրպարտչական արտահայտություններ, ինչպես նաև՝ ՀՀ-ի անունից Քոչարյանի անմեղության կանխավարկածը խախտելու հարցը։ Ալումյանի խոսքով՝ այն դատավորը, որը չիւ համարձակվում չընդունել ակնհայտ ապօրինի լիազորագիրը, որովհետև դրա տակ դրված է վարչապետի ստորագրությունը, չի կարող վճիռ կայացնել՝ ընդդեմ նույն անձի։

Դատարանը հեռացել է խորհրդակցական սենյակ՝ որոշում կայացնելու։ Որոշումը հրապարակվել է հունվարի 13-ին, ժամը՝ 11.30-ին։
Հիշեցնենք, որ Ռ․ Քոչարյանի քաղհայցը վերաբերում է նախորդ տարվա մարտի 1-ին Հանրապետության հրապարակում հրավիրված հանրահավաքի ընթացքում Նիկոլ Փաշինյանի կողմից հնչեցրած զրպարտչական արտահայտություններին։ Ապրիլին Ռ․ Քոչարյանի պաշտպան Հայկ Ալումյանը հայց է ներկայացրել հրապարակայնորեն արտահայտված զրպարտությունից պատիվը և արժանապատվությունը պաշտպանելու և զրպարտությամբ պատճառված ոչ նյութական վնասի հատուցման պահանջով։

Աղբյուր` Փաստինֆո