Փաստ ինֆո

Նորքի ինֆեկցիոն հիվանդանոցի աշխատակիցներին տնօրեն Վարդան Ավագյանը խոստացել է, որ կշարունակեն աշխատել մինչև ամսվա վերջ: Այս մասին տնօրենի հետ հանդիպումից հետո լրագրողներ հայտնեց բուժքույր Աիդա Գեւորգյանը։

« Մեզ անպայման տեղավորելու են աշխատանքի կամ ինչ-որ նոր մասնաշենք են տրամադրելու: Այսօր առողջապահության նախարարություն են գնալու, որ որոշեն՝ հետագայում ինչ է լինելու։ Մեզ տնօրենն ասել է, որ պետք է շարունակենք աշխատել, մինչև տեղի հարցը քննարկվի և իմանանք, թե ինչ է լինելու մեր հետագա անելիքը, դրսում չենք մնալու», - ասաց աշխատակիցը՝ նշելով, որ տնօրենը վստահեցրել է, որ մինչեւ հունվարի 30-ը «տաբելները» բացած է, իսկ հետո էլ կփորձեն մյուսներին տեղավորել աշխատանքի։
Աշխատանքից ազատվելու պահանջ է ներկայացվել 113 աշխատակցից 80-ին՝ ասելով, թե հիվանդանոցը վերակառուցվում է։ Ընդ որում՝ տրամադրվել են նաեւ աշխատանքից ազատման դիմումի ձեւաթղթերը, թե, իբր, սեփական դիմումի համաձայն են ազատվում։ Սակայն աշխատակիցները հրաժարվել են ստորագրել։

«Երկու օր առաջ եմ նախարարի կողմից շնորհակալագիր ստացել, այսօր ինձ աշխատանքից ազատում են, չգիտենք՝ հետո ինչ կլինի մեր վիճակը:Աշխատանքից ազատում են՝ առանց հիմքի, հիվանդանոցի փաստաբանը եկավ, աշխատանքից ազատվող աշխատակիցների անունները կարդաց, որոնցից մեկը ես էի, երբ հարցրինք՝ ինչո՞ւ ես աշխատանքից ազատում, ասաց ՝չգիտեմ: Ես 32 տարվա աշխատանքային ստաժ ունեմ,բայց էլ չեմ ուզում գալ աշխատանքի»,-ասաց Նորքի ինֆեկցիոն հիվանդանոցի աշխատակիցներից մեկը:
Մյուս աշխատակիցն էլ պատմեց, որ կովիդով պայմանավորված շուրջ 4 ամիս տուն չեն գնացել, հիվանդանոցի տնօրինությունն ասել է, որ հավելավճարներ կտա ծանրաբեռնված աշխատանքի համար, սակայն հետո ասել են, որ բարեգործական հիմունքներով են այդ աշխատանքը կատարում ու գումար չեն տվել:

Նշենք, որ այսօր առավոտից Նորքի ինֆեկցիոն հիվանդանոցի աշխատակիցներն այժմ կենտրոնի դիմաց բողոքի ակցիա են իրականացնում։
Աշխատանքից ազատման պահանջ է ներկայացվել նաեւ ընդունարանի մի քանի բուժաշխատողների՝ կրկին առանց որեւէ պատճառաբանության։ Երկարամյա բուժաշխատողները տարակուսած են, եթե իրենց մասնաշենքը չի լուծարվում՝ ինչու են նաեւ իրենցից պահանջում, որ ազատման դիմում գրեն, որ հետո ուրիշների՞ն ընդունեն աշխատանքի։

Թեեւ Վ. Ավագյանը ակցիայից հետո բուժաշխատողների հետ հանդիպմանը վստահեցրել է, թե կփորձեն կարգավորել նրանց աշխատանքի տեղավորման հարցը, սակայն շատերը թերահավատ են ու չգիտեն, թե ինչ է իրենց սպասվում վաղը։

Մանրամասները՝ տեսանյութում։

Աղբյուր` Փաստինֆո