Փաստ ինֆո

Գագիկ Ջհանգիրյանը դատավոր Զարուհի Նախշքարյանի գործով որոշման փաստարկման հետ կապված մի դրույթ հրապարակեց, որը մեզ համար այնքան էլ ընդունելի չէ։ Լրագրողների հետ զրույցի ժամանակ ասաց փաստաբան Ռուբեն Մելիքյանը։

Փաստաբան Սիրանուշ Սահակյանը մանրամասնեց՝ ԲԴԽ-ի որոշման եզրափակիչ մասում նշվում է, որ Զարուհի Նախշքարյանի արարքը պարունակել է խախտման հատկանիշներ, սակայն չի հեղինազրկել դատական իշխանությանը։

«Մենք համաձայն չենք այս մոտեցման հետ։ Ի սկզբանե Զարուհի Նախշքարյանի արարքում որևէ խախտման անգամ ձևական հատկանիշներ առկա չեն եղել։ Նա իրականացրել է արդարադատություն, որի շրջանակներում տվել է փաստերի ու ապացույցների մեկնաբանություն։ Որևէ քաղաքացի, որևէ պաշտոնատար անձ չի կարող իր գնահատականներով կասկածի տակ դնել դատարանի գնահատականը»,-նշեց Սիրանուշ Սահակյանը։

Վերջինս նկատեց՝ եթե անգամ այդ փուլերում տեղի են ունենում սխալներ, ինչը Զարուհի Նախշքարյանի դեպքում տեղի չի ունեցել, դրա համար գործում են Վերաքննիչ Վճռաբեկ դատարանները, և նմանատիպ խնդիրները պետք է լուծվեն վերաքննության արդյունքում։

«Երբևիցե այդ հատկանիշներով դատավորի գործունեությանը չեն կարող միջամտել, և դատավորի համար սպառնալիքներ, այդ թվում կարգապահական պատասխանատվության տեսքով չեն կարող ստեղծել։ Սա դատական իշխանության անկախության հարց է, և մենք պետք է պայքարենք այնքան, որ յուրաքանչյուր դատավորի առնչությամբ այս սկզբունքը հարգվի։ Առաջիկայում այլ գործընթացներ սպասվում են թե՛ երկրի ներսում, թե՛ դրսում»,-ասաց Սիրանուշ Սահակյանը։

Աղբյուր` Փաստինֆո