Փաստ ինֆո

Ղազախստանում շարունակվող հասարակական անկարգությունների պատճառն ավելի խորքային է, գազի գնի թանկացումն ընդամենը առիթ է, հիմնական պատճառն այդ երկրում առկա սոցիալ-տնտեսական իրավիճակն է, անարդարությունը: «Փաստինֆո»-ի հետ զրույցում նման դիտարկում արեց անվտանգության հարցերով փորձագետ Արմեն Մանվելյանը՝ անդրադառնալով Ղազախստանում տիրող իրավիճակին:

Հիշեցնենք, որ Ղազախստանում մեծածավալ բողոքի ակցիաներ են սկսվել՝ ընդդեմ գազի գների թանկացման:

Ակցիաները ուղեկցվում են անկարգություններով և խռովություններով, գրավում են պետական կառույցների, ոստիկանական շենքեր: Բողոքի ակցիաները հանգեցրել են Ղազախստանի կառավարության հրաժարականին, իսկ նախկին նախագահ Նուրսուլթան Նազարբաևն էլ հրաժարական է տվել Ղազախստանի Անվտանգության խորհրդի ղեկավարի պաշտոնից:

Ըստ Արմեն Մանվելյանի՝ Ղազախստանում տեղի ունեցող գործընթացներում կա արտաքին ուժերի միջամտությունը և մասնակցությունը, Արևմտյան և ռուսական կողմերը փորձում են իրենց ազդեցությունն ունենալ այդ երկրում.

«Բայց չեմ կարծում, թե Ռուսաստանը շահագրգռված է Ղազախստանում անկարգություններ հրահրելով: Այս հարցում կարող է լինել թուրքական և իսլամական գործոնների ազդեցությունը, որն արդեն առանձին ֆակտոր է»,-նկատեց զրուցակիցը:

ՀԱՊԿ-ը զորք է ուղարկել Ղազախստան՝ երկրում կարգ ու կանոն վերականգնելու նպատակով, ինչը ըստ մեր զրուցակցի, միջամտություն է այլ երկրի ներքին գործերին:

Արմեն Մանվելյանի արձանագրմամբ՝ սա նաև Ռուսաստանին ՀԱՊԿ-ի աջակցության դրսևորում է.

«ՀԱՊԿ կանոնադրությունը չի նախատեսում նմանատիպ գործողություն, նման գործողություն է նախատեսվում միայն արտաքին հարձակման դեպքում, բայց այս հարցը արտաքին հարթակում չէ: ՀԱՊԿ-ի միջամտությունն ավելի շատ ռուսական ազդեցության և ռուսական կողմի քաղաքական գծին սատարելու հարց է»,-ասաց փորձագետը:

ՀԱՊԿ շրջանակում Հայաստանը ևս 100 հայ զինվորական է ուղարկել Ղազախստան:

Դիտարկմանը, որ Հայաստանը զորք է ուղարկում մի երկիր, որը 44-օրյա պատերազմի ողջ ընթացքում ակնհայտ աջակցություն է ցուցաբերել Ադրբեջանին, Արմեն Մանվելյանն արձագանքեց, որ Նիկոլ Փաշինյանի քայլերը «թելադրված են» Մոսկվայից, եղել է պարտադրանք և հայկական կողմը արել է.

«Մյուս կողմից էլ, չնայած Ղազախստանի պրոադրբեջանական քաղաքականությանը, այնտեղ տիրող իրավիճակը չի բխում Հայաստանի շահերից, քանի որ եթե այդ երկրում անկառավարելի իրավիճակ ստեղծվի, ապա դա կբերի ՀԱՊԿ-ի և ԵԱՏՄ-ի կազմաքանդմանը, ինչը ստրատեգիկ առումով ձեռնտու չի Հայաստանին: Շատ դեպքերում մեր շահերը համընկնում են Ռուսաստանի շահերի հետ, քանի որ Ղազախստանում իրադարձությունները կարող էր անդրադառնալ նաև Հայաստանի վրա: Մեզ ձեռնտու չի, որ Ղազախստանում փողոցի ուժերը գան իշխանության, մեզ ձեռնտու է որ Ղազախստանում կայունություն լինի, բայց սա չի նշանակում, որ Հայաստանը պետք է զորք ուղարկեր Ղազախստան »,-ասաց Մանվելյանը:

Դիտարկմանը, որ Նիկոլ Փաշինյանն ինքը 2018թ-ին իշխանության է եկել անհնազանդության տարբեր ակցիաների միջոցով, քննադատել է նախկին իշխանություններին՝ 2018թ-ին «ժողովրդի դեմ զորք հանելու մեջ», հիմա ինքն է այլ երկիր զորք ուղարկում՝ անհնազանդության ակցիաները դադարեցնելու նպատակով, Արմեն Մանվելյանն արձագանքեց.

«Մի մարդ, որը փողոցից է եկել իշխանության՝ անկարգություններ հրահրելով, հիմա այլ ցուցարարների դեմ է զորք ուղարկում, սա ցույց է տալիս այս իշխանության ցինիզմը և ոչ սկզբունքային լինելը: Այս մարդիկ չեն գնում Հայաստանի շահերը պաշտպանելու ճանապարհով, այլ գնում են սեփական իշխանությունը պահպանելու ճանապարհով: Ղազախստան զորք ուղարկելը պետք է դիտարկել նաև սեփական իշխանություն պահելու տեսանկյունից, հիմա ներկա իշխանությունները կկատարեն ամեն քայլ, որպեսզի երկարաձգեն իրենց իշխանությունը, քանի որ նրանց ֆիզիկական գոյությունը նաև կախված է՝ որքան կմնան իշխանության»:

Աղբյուր` Փաստինֆո