Փաստ ինֆո

Հակածխախոտային օրենքն աշխարհի ամենաանիրագործելի, սխալ ու պոպուլիստական օրենքն է, և երևի միայն Հայաստանում է, որ Էկոնոմիկայի և Ֆինանսների նախարարությունները լուռ ուզում են նման պոպուլիստական փորձարկումներ անել։ «Փաստինֆո»-ի հետ զրույցի ժամանակ ասաց «Ռեստորանների ասոցիացիա» ՀԿ հիմնադիր Աշոտ Բարսեղյանը՝ անդրադառնալով հանրային սննդի օբյեկտերում, այդ թվում՝ բացօթյա սրճարաններում, ռեստորաններում ծխախոտային արտադրատեսակների օգտագործման արգելքին։

Նշենք, որ նշված արգելքն ուժի մեջ է մտնելու մարտի 15-ից։

Աշոտ Բարսեղյանը վստահ է, որ այս օրենքն առողջապահական առումով ոչ մի ազդեցություն չի ունենա.

«Հայաստանն այն վիճակում չի գտնվում, որ իրեն այդ շռայլությունը թույլ տա և սահմանափակի գահավիժող տնտեսությունը, իսկ սա ուղիղ հարված է այդ բնագավառին։ Ծխախոտային ինդուստրիայի շրջանառությունը 110 մլրդ դրամ է։ Խա՞ղ են անում 110 միլիարդի հետ։ Ծխախոտ արտադրողները և վաճառողները խոշոր հարկատուներն են։ Այս օրենքից նաև զբոսաշրջությունն է տուժելու։ Ենթադրենք 50-100 հատ կալյան փակեցին, 3000 հոգի անգործ կմնա, զբոսաշրջիկներն էլ չեն կարողանա կալյան ծխել, ո՞րը կլինի դրա օգուտը»,-նշեց Աշոտ Բարսեղյանը։

«Ռեստորանների ասոցիացիա» ՀԿ-ն հանդես է եկել կոչով և դիմել ՀՀ կառավարությանը, Էկոնոմիկայի, Ֆինանսների նախարարություններին, որ անհապաղ վերանայեն օրենքը։

Աշոտ Բարսեղյանը նկատում է՝ Հայաստանում օրական 300 հազար մարդ նստած է բացօթյա սրճարաններում, ո՞վ է այդքանին վերահսկելու, որ չծխեն։

«Տուգանելու՞ են ռեստորաններին։ Տուգանելուց առաջ թող մտածեն, թե այդ տնտեսվարողներն ինչպես են բիզնեսը, նաև աշխատատեղերը պահում։ Այս օրենքն Արսեն Թորոսյանի շնորհակալությունն է բազում տարիներ իրենց աճեցրած ԱՀԿ-ին։ Այստեղ որևէ այլ բան չկա»,-նշեց Աշոտ Բարսեղյանը։

Անդրադառնալով հանրային սննդի վայրեր, մշակութային միջոցառումներ այցելելիս պատվաստման սերտիֆիկատ կամ թեստի պատասխան ներկայացնելու հրամանին՝ Աշոտ Բարսեղյանը նշեց, որ ևս մեկ անգամ գործ ունենք պետական մակարդակով ոչ պրոֆեսիոնալ պահվածքի, պոպուլիստական տեքստերի հետ։

«Առողջապահության նախարարն էլ է պատկերացնում ու գիտակցում, որ QR կոդի իսկությունը ստուգելու ոչ մի մեխանիզմ տնտեսվարողի ձեռքը չի կարող լինել։ Պարզապես առողջապահության մեր պատասխանատուներն ԱՀԿ-ից նման հրահանգ են ստացել ու դա են անում՝ առանց հասկանալու, որ դա ոչ մեկ չի ստուգելու և չի իրականացնելու»,-հավելեց Աշոտ Բարսեղյանը։

Նշենք, որ հունվարի 10-ին կհրապարակվի հրամանը, համաձայն որի՝ հանրային սննդի վայրեր, մշակութային միջոցառումներ, համերգներ, թատրոններ այցելելուց քաղաքացիները պետք է ներկայացնեն կամ ՊՇՌ բացասական թեստի արդյունք կամ պատվաստման սերտիֆիկատ: Այն ուժի մեջ կմտնի առաջիկա 15 օրվա ընթացքում։

Աղբյուր` Փաստինֆո