Փաստ ինֆո

Կառավարությունն այսօրվա նիստում հաստատեց ինքնակամ կառույցների հաշվառման կարգը սահմանելու մասին հարցը:

Կադաստրի կոմիտեի ղեկավար Սուրեն Թովմասյանն ասաց, որ այս կարգով կանոնակարգում են ինքնակամ շինությունների վերաբերյալ տվյալների հավաքագրումը: Կարգավորումների համաձայն՝ ինքնակամ կառույց ունեցող քաղաքացին պետք է դիմի չափագրման մասնագետին, որը տեղում պետք է ուսումնասիրի շինությունները, այնուհետև չափագրման փաթեթ կազմի:

«Այս կարգի ընդունումից հետո սահմանվում է երկամսյա ժամկետ՝ 2021թ.-ին կառուցված ինքնակամ շինությունների հաշվառման համար: Երկու ամիս հետո հաշվառված են համարվելու այն ինքնակամ շինությունները, որոնց վերաբերյալ տեղեկատվությունները մուտքագրված են լինելու չափագրողների առցանց գրասենյակ:

Երևանի համար ինքնակամ կառույցների հաշվառման ժամկետ է սահմանված և այդ ժամկետն ավարտվում է 2023թ.-ի հունվարի 1-ին, իսկ մյուս քաղաքային բնակավայրերում վերջնաժամկետ է սահմանված մինչև 2024թ.-ի հունվարի 1-ը: Այս կարգի ընդունումից հետո ակնկալում ենք, որ ՀՀ-ում վերջ կդրվի ինքնակամ կառույցների ժամանակաշրջանին և կշարժվենք քաղաքակիրթ ճանապարհով»,-նշեց կադաստրի կոմիտեի ղեկավարը:

ՀՀ վարչապետ Նիկոլ Փաշինյանն էլ ընդգծեց՝որ որևէ բան կառուցելու համար պետք է լինի շինթույլտվություն և նախագիծ: Վարչապետի խոսքով առանց նախագծի ՀՀ-ում որևէ շինության կառուցումն արգելվում է:
Այնուհետև Նիկոլ Փաշինյանը հետաքրքրվեց, թե ինչպես են կառավարելու ռիսկերը, որ այս ընթացքում ՀՀ-ում ինքնակամ կառույցների բում տեղի չունենա:

«Հանրապետությունում այդ գործընթացն ավարտվելու է մինչև 2025 թվականը, իսկ այդ ընթացքում կարելի է անսահամանափակ քանակությամբ ինքնակամ կառույցներ ստեղծել»,-ասաց վարչապետը:

Կադաստրի կոմիտեի ղեկավարն ասաց, որ 2021թ.-ին իրականացված օդային լուսանկարահանման արդյունքում արձանագրել են մինչև 2021-ը կառուցված ինքնակամ շինությունները, հետևաբար պարզ կլինի, որ այդ լուսանկարներում չներգրավված շինությունները նոր կառուցված ինքնակամներ են:

Աղբյուր` Փաստինֆո