Փաստ ինֆո

Վարդենիսում կրքերը չեն հանդարտվում: «Քաղաքացիական պայմանագիր» խմբակցությունն այսօր՝ հունվարի 3-ին, Վարդենիսում ավագանու արտահերթ նիստ է հրավիրել, սակայն նիստը չի կայացել, քանի որ  ավագանու անդամների մեծ մասը չի ներկայացել և քվորում չի ապահովել:

«Փաստինֆո»-ի հետ զրույցում Գեղամասար համայնքի նախկին ղեկավար Հակոբ Ավետյանը մանրամասնեց, որ թեև դեկտեմբերի 30-ին Վարդենիսում արդեն համայնքի ղեկավար ընտրվել է «Ահարոն Խաչատրյան» դաշինքի առաջին համարը՝ Ահարոն Խաչատրյանը, սակայն ՔՊ-ն այսօր ևս ավագանու նիստ է հրավիրել՝ համայնքապետի ընտրության հարցով:

Ընդդիմադիր «Միասնական Վարդենիս» և «Ահարոն Խաչատրյան» խմբակցությունները չեն մասնակցել, իսկ ՔՊ-ականներից էլ միայն մի քանի հոգի է ներկայացել.

«Այսօր պետք է նիստ լիներ, բայց չի կայացել, նախ՝ ՔՊ-ն 13 հոգով չէր էլ կարող քվորում ապահովել, բացի դա՝ իրենց 13 հոգուց մի մասն էլ չի ներկայացել:

Ընդդիմությունն ընդհանրապես չի ներկայացել, քանի որ օրինական նիստը արդեն կայացել է դեկտեմբերի 30-ին, համայնքի ղեկավար արդեն ընտրվել է, հունվարի 4-ին էլ երդմնակալության արարողությունն է լինելու»,-ասաց Հակոբ Ավետյանը:

Հիշեցնենք, որ դեկտեմբերի 30-ի Վարդենիսի ավագանու նիստի ժամանակ, թեև ՔՊ-ն ամեն կերպ փորձում էր խոչընդոտել համայնքապետի ընտրությանը, բայց ընդդիմադիր «Միասնական Վարդենիս» և «Ահարոն Խաչատրյան» խմբակցությունների 14 անդամները՝ 14 կողմ, զրո դեմ, զրո անվավեր ձայներով համայնքի ղեկավար ընտրեցին Ահարոն Խաչատրյանին:

Աղբյուր` Փաստինֆո