Փաստ ինֆո

Վարդենիսի քարտուղարության աշխատակիցը պատռեց նիստի փաստաթուղթը, որտեղ հաղթել էր ընդդիմությունը։ Փաստաբան Վարազդատ Հարությունյանը լրագրողների հետ զրույցում նշեց՝ ՔՊ-ականների արածը մանկամտություն էր։ Վերջինս տեղեկացրել է, որ նիստը արձանագրողին՝ աշխատակազմի ղեկավարին փակի տակ են պահում։

«Հիմա որ իրենք պահում են, արհեստականորեն չեն թողնում Զարոյանը դուրս գա, ոստիկաններին խնդրել ենք լարվածությունը թոթափել։ Ձևը մեկն էր՝ աշխատակազմից մեկը պետք է գար, ստորագրեր մեր օրինակի վրա, իրենց օրինակը ստանար։ Մենք միևնույնն է ծանուցելու ենք՝ փոստով, հետադարձ նշումով, պատվիրված նամակով։ Արձանագրությունը կա՝ էդ աղջիկը ստացել է արձանագրությունը ու պատռել։ Իրենց արածը մանկամտություն է։ Լարվածության այնպիսի ֆոն են ստեղծել, որի տակից դուրս չեն գալու»։

Հարցին՝ արդյոք կսկսվի գործընթաց, որ ընտրությունները կչեղարկվեն, փաստաբանը նշեց՝ հնարավոր է ՔՊ-ականները դիմեն վարչական դատարան, անվավեր ճանաչեն որոշումը, սակայն իրենք կպաշտպանեն ընդդիմության որոշումը։

«Եթե նման գործընթաց սկսեն, ևս մեկ անգամ այս պրոցեսը կհանրայնացնենք, բոլորը կտեսնեն՝ ինչ է կտարվել այսօր ավագանու նիստում»։
Հիշեցնենք՝ 14 կողմ, զրո դեմ, զրո անվավեր ձայներով Վարդենիս համայնքի ղեկավար է ընտրվում «Ահարոն Խաչատրյան» դաշինքի թեկնածու Ահարոն Խաչատրյանը։

Նշենք, որ մինչ այդ ավագանու ՔՊ-ական անդամ Նաիրա Մանուչարյանը հայտարարել էր, որ իրենց ոչ ոք չի տեղեկացրել, որ ավագանու ընդհատված նիստը այսօր շարունակվելու է, այն նախատեսված է հունվարի 3-ին, հետեւաբար իրենք չեն մասնակցել այդ նիստին: Նիստը, ըստ էության, ընթանում էր առանց ՔՊ-ի անդամների։

Նաիրա Մանուչարյանը տեղի ունեցողը համարեց դավադրություն եւ հանցավոր գործունեություն:

Այդուհանդերձ, ավագանու ընդդիմադիր 14 անդամները հավաքել եւ նիստ են անցկացրել եւ ընտրել համայնքի ղեկավար:
Ահարոն Խաչատրյանը շնորհակալություն հայտնեց ավագանու ընդդիմադիր խմբակցություններին, իրեն վստահելու կապակցությամբ: Որոշվեց՝ ավագանու նստաշրջանի առաջին օրը կլինի փետրվարի 8-ին:

Աղբյուր` Փաստինֆո