Փաստ ինֆո

ՀՀ նախկին գլխավոր դատախազ, ՔԿ նախկին նախագահ Աղվան Հովսեփյանի նկատմամբ ընտրված խափանման միջոց կալանավորումը ևս երկու ամսով երկարացնելու մասին միջնորդություն է ներկայացվել դատարան։ Միջնորդությունը կրկին մակագրվել է Երևանի ընդհանուր իրավասության դատարանի դատավոր Դավիթ Արղամանյանին։

Փաստաբան Էրիկ Ալեքսանյանը «Փաստինֆո»-ի հետ զրույցում հայտնեց, որ դատավոր Արղամանյանին ինքնաբացարկի միջնորդություն են ներկայացրել։ Երեկ տեղի ունեցած դատական նիստի ընթացքում փաստաբանը խնդրել է դատարանից պարզաբանել, թե երբ է գործը մակագրվել դատավորին, ինչին ի պատասխան՝ վերջինս հայտնել է, որ մակագրումը եղել է դեկտեմբերի 27-ի երեկոյան, մինչդեռ, փաստաբանի դիտարկմամբ, կալանքի ժամկետի երկարացման նյութերը բաղկացած է 4.5 հատորից, որոնցից յուրաքանչյուրը կազմված է 300-370 էջից։ Փաստաբանը հետաքրքրվել է, թե դատավորը դեկտեմբերի 27-ից հետո քանի դատական նիստ է եղել, ինչ բնույթի միջնորդություններ է քննարկել՝ պարզելու, թե արդյոք դատարանը որքան ժամանակ է ունեցել 4.5 հատոր նյութերին ծանոթանալու համար, քանի որ, եթե դատարանը չի հասցրել նյութերին ծանոթանալ և դատական նիստը բացել, ցանկանում է միջնորդությունը քննել, ապա դատարանի օրինականության հետ կապված խնդիր կա։ Ավելին՝ Արղամանյանը  չի կարող որպես օրինական դատարան հանդես գալ, եթե առանց նյութերին ծանոթանալու պատրաստվում է միջնորդության քննություն իրականացնել։ Արղամանյանը, սակայն, պարզաբանում չի ներկայացրել, թե քանի դատական նիստ է ունեցել այդ օրերի ընթացքում։ Արղամանյանը տեղեկատվությունը չտրամադրելը պատճառաբանել է այն հանգամանքով, որ Քրեական դատավարության օրենսդրությունը չի նախատեսում հնարավորություն՝ նման տեղեկատվություն տրամադրելու, դատարանը նման լիազորություն չունի, թեև մինչ այդ դատարանը հայտնել էր, որ դատական նիստի օրը՝ երեկ, ունեցել է մեկ դատական նիստ։  Ըստ փաստաբանի՝ մի դեպքում դատարանը տեղեկատվություն տրամադրել է, մեկ այլ դեպքում՝ ոչ, դիրքորոշման ներքին հակասությունը տարակուսելի է։ Պաշտպանության կողմը մտահոգություններ ունի, որ դատարանը ծանրաբեռնված է եղել և չի կարողացել ծանոթանալ գործի նյութերին, իսկ տեղեկատվությունը չի տրամադրել՝ փակուղու մեջ չհայտնվելու համար։ Պաշտպանները Դավիթ Արղամանյանին ինքնաբացարկի միջնորդություն են ներկայացրել, որը մերժվել է։ Դատավորը շարունակում է քննել Աղվան Հովսեփյանի խափանման միջոցի հարցը։ 

Հիշեցնենք, որ Աղվան Հովսեփյանը ձերբակալվել է սեպտեմբերի 7-ին՝ առավոտյան։ Նախաքննական մարմինը շուրջ 1.5 տարի քննվող քրեական գործի շրջանակներում մեղադրանք է առաջադրել Հովսեփյանին և նրա նկատմամբ կալանավորումը որպես խափանման միջոց ընտրելու մասին միջնորդություն ներկայացրել դատարան, որը դատավոր Մնացական Մարտիրոսյանի կողմից բավարարվել է։

Ընդ որում՝ մոտ 45 տարի իրավապահ կառույցներում ամենաբարձր ղեկավար պաշտոններ զբաղեցրած Աղվան Հովսեփյանին նախաքննական մարմինը չի կարողացել իր ծառայական գործունեության հետ կապված որևէ ապօրինություն մեղսագրել։ Նրան մեղադրանք է առաջադրվել ապօրինի ձեռնարկատիրական գործունեություն ծավալելու, ենթադրյալ փողերի լվացման հատկանիշներով։

Կալանավորման որոշումը կայացնելիս անգամ դատարանն արձանագրել է, որ բացակայում է քննությունից թաքնվելու հավանականությունը, ու որպես կալանավորման հիմք մատնանշել նրա նախկինում զբաղեցրած բարձր պաշտոնները, թե, իբր, կարող է ազդել քննության վրա՝ առանց որեւէ փաստացի օրինակ մատնանշելու։

Հեղինակ՝ Իզաբել Սահակյան

Աղբյուր` Փաստինֆո