Փաստ ինֆո

««Ահարոն Խաչատրյան» դաշինքի փաստաբաններին հաջողվել է մուտք գործել Վարդենիսի համայնքապետարանի սենյակներից մեկում մեկուսացված ավագանու անդամ, ընդդիմադիրԱհարոն Խաչատրյանի մոտ, որին մեկ ու կես ժամ է ոստիկանները փակի տակ էին պահում։
Փաստաբանը լրագրողների հետ զրույցում տեղեկացրեց, որ սենյակը դարձել է «մինի աշխատասենյակ»։ Ոստիկանությունը որոշել է բերման ենթարկելու ամբողջ գործընթացը այդտեղ անցկացնել։

«Մենք փաստաբաններով ներսում ենք։ Հավանաբար արձանագրությունը բերելու են, որ սենյակում կազմվի, որին հետևելու ենք։ Ոստիկանապետի, մարզային վարչության պետի հետ խոսել ենք, պարզաբանել ենք, որ այս մարդիկ որևէ նպատակ չունեն հետաքննության մարմնի պահանջով ներկայանալու։ Բերման ենթարկելու ժամը մոտենում է ավարտին՝ արձանագրությունը կկազմվի, մենք մեր դիտարկումները գործընթացի մասին կներառենք հայտարարության տեքստում, որից հետո ավագանու նիստը պետք է շարունակվի։ Ավագանու նիստից հետո ծանուցում ներկայացնելուց հետո, նրանք կներկայանան՝ մենք էլ որպես փատաբաններ»։

Փաստաբանը նշեց՝ այսօրվա Հայաստանում ոչինչի վրա վստահ չէ՝ մանավանդ, վստահ չէ իրավական կառուցակարգերի ճիշտ մեկնաբանման և կիրառման մեջ։

«Այն ինչ մենք տեսանք առավոտից, իրավական ոչ մի կառուցակարգի մեջ չի տեղավորվում։ Ոստիկանությունը ամեն գնով անում է այն, ինչ տեսնում եք։ Ժամը ֆիքսել ենք, սպասում ենք ավարտենք, արձանագրությունը կկազմեն, մենք մեր նկատառումները կանենք, եթե չեն հասցնի՝ ոչ ոք իրավունք չունի խոչընդոտել նիստին գնալը, եթե ֆիզիկական ուժ գործադրելով պարզապես չմեկուսացնեն անդամներին»։

Հիշեցնենք՝ Վարդենիսի նորընտիր ավագանու անդրանիկ նիստը տապալվել է։ Ոստիկանները բերման են ենթարկել ՔՊ-ական Արամ Մելքոնյանին, որը, ըստ փաստաբանների, նիստից առաջ տեղի ունեցած միջադեպի հեղինակն է եղել, ապա հաղորդում է ներկայացրել ոստիկանություն: Մելքոնյանը հոժարակամ ներկայացել է ոստիկանություն՝ բացատրություն տալու։

Ոստիկանները մուտք են գործել նիստերի դահլիճ։ Մեկ ժամից ավելի է բերման են ենթարկել ավագանու անդամ Կարեն Մկրտչյանին։ Առանձին սենյակում մեկուսացրել են ըննդիմադիր դաշինքի առաջին համար Ահարոն Խաչատրյանին: Վարդենիսի բաժնի ոստիկանապետի ծառայության գծով տեղակալ Քոչարյանը պաշտպանին ներկայացրել է ՝ սենյակում ընդամենը զրույց է։ Պաշտպանը հակադարձել է։

Փաստաբաններին ուժի կիրառմամբ թույլ չէր տրվում մտնել սենյակ՝ իբրև միջադեպի մասին բացատրություններ ստանալու: Վերջինս պնդում էր՝ Վարդենիսում ընդդիմադիրներին առեւանգել են, ոչ թե բերման ենթարկել։

Աղբյուր` Փաստինֆո