Փաստ ինֆո

Նիկոլ Փաշինյանն իր ասուլիսում, ըստ էության, ասաց՝ Արցախն Ադրբեջան է, և վերջ: Այս մասին ասուլիսի ժամանակ հայտարարեց ռազմական փորձագետ Դավիթ Ջամալյանն՝ անդրադառնալով Նիկոլ Փաշինյանի հայտարարությանը, թե ԼՂԻՄ-ը երբեք բանակցային գործընթացում չի դիտարկվել որպես զուտ հայկական միավորում.

«Կապիտուլյանտը կանխատեսելի է, գալու էր պահը, երբ նա իրեն բնորոշ մանիպուլատիվ ոճով սկսելու էր զարգացնել Արցախը վերջնականապես Ադրբեջանին հանձնելու ստոր նպատակը: Այդ գաղափարը, որ Արցախը պետք է մնա Ադրբեջանի կազմում նա նպատակադրված բերեց լրատվական դաշտ: Ընդ որում՝ Նիկոլ Փաշինյանն այդ գաղափարը լրատվական դաշտ է բերում այն բանից հետո, երբ իր որոշ թիմակիցներ, զանգվածակիցներ, ժամանակին առաջինն էին արտահայտվել դրա մասին: Տրամաբանությունը հստակ է, մերժելի և դավաճանական գաղափարն առաջինն ասում են իր զանգվածից այն անձինք, որոնք զրո հեղինակություն ունեն, կորցնելու ոչինչ չունեն, որից հետո զանգվածի պարագլուխը իրեն բնորոշ մանիպուլատիվ ոճով ինքն է զարգացնում այդ գաղափարը»,-ասաց Ջամալյանը:

Ըստ Դավիթ Ջամալյանի՝ Հայաստանը 2018թ-ին աննախադեպ շահեկան բանակցային դիրքերով թևակոխել է «թուրքական հեղափոխություն»:

Փորձագետի արձանագրմամբ՝ 2016թ-ի ապրիլյան մարտական գործողություններից հետո Արցախի պետական սահմանը վերահաստատվեց, և լեգիտիմացվեց, պետք էր ռազմի դաշտում ձեռք բերված հաղթանակը փոխակերպել դիվանագիտական հաղթանակի, ուստի պատահական չէ, որ այս ամենին հաջորդեց Վիեննայի և Սանկտ Պետերբուրգի պայմանավորվածությունները.

«Զարհուրելի է, որ հիմա Հայաստանում իշխանության է հայտնվել մեկը, որը ընդունում է, որ Արցախն անգամ այս բզկտված վիճակով լինի Ադրբեջանի կազմում, հիմա էլ դիմադրության օջախներ ենք ստեղծում, որ դիմակայենք այս խայտառակությանը»,-ասաց ռազմական փորձագետը:

Անդրադառնալով Արցախի նախագահի հայտարարությանը՝ որ միայն Արցախի Հանրապետության իշխանություններն են լիազորված խոսելու Արցախի բնակչության անունից, փորձագետն ընդգծեց՝ Փաշինյանի հայտարարությունը կարմիր գիծն էր, որից հետո Արցախն արդեն պետք է խոսեր:

Աղբյուր` Փաստինֆո