Փաստ ինֆո

«Իշխանություններն իրենց գործած հանցանքին հանցակից են դարձնում բազմաթիվ պաշտոնյաների»՝ այս միտքը, որ երեկ ՀՀ 2-րդ նախագահ Ռոբերտ Քոչարյանն իր ասուլիսի ընթացքում հիշեցրեց՝ ներկա իշխանության մասին է։ Այս մեկը՝ նույնպես՝ «Հայտնի ճշմարտություն է՝ ոչինչ այնքան չի կապում մարդկանց, որքան գործած հանցանքը, մեղքը»։

Ընդ որում, իշխանությունը համատարած բոլոր պաշտոնյաներին է կարծես ձգտում թաթախել իր գործած մեղքերի մեջ։ Մեղավորության սինդրոմին հաջորդում է հլու-հպատակության սինդրոմը, որն օրենք ու իրավունք չի ճանաչում այլևս, ընդ որում, բանը հասնում է նրան, որ օրենքի մարդը՝ իրավապահն է տրորում- անցնում իր մասնագիտության և դավանանքի, երդման վրայով անգամ։

ՀՀ ուժային կառույցների ղեկավարները անցած 3․5 տարիների ընթացքում Փաշինյանին մեկը մեկից շատ և ավելի հպատակվելու օրինակներ են ցույց տվել։ Եվ շարունակում են տալ։

ՈՒշագրավ էր Ռ․ Քոչարյանի երեկվա անդրադարձը՝ տեղական ինքնակառավարման մարմինների ընտրություններից հետո համայնքապետերի և թեկնածուների կալանավորումներին, իշխանությանը հակառակ տեսակետ ունեցողների ազատազրկումներին՝ դրանք որակելով խայտառակություն։

Իրենց ժողովրդավար համարող, այդ դրոշի ներքո իշխանության եկածներն այսօր ազատ խոսքի և ազատ մտքի ցանկացած դրսևորման դեմ բռնի ուժով են պատասխանում։ Այսինքն, «խոսքի ազատության ապաքրեականացումը, որ նախորդ տարիների ձեռքբերումն էր, այսօր անազատության սպառնալիք է և իշխանության վարած քաղաքականությունը քննադատող լրատվամիջոցների համար, և՛ նույնիսկ ՏԻՄ ընտրությունների ժամանակ ոչ իշխանահաճո թեկնածուների։

Ռ․ Քոչարյանը զարմանքով է արձանագրում՝ «Կալանավորումների քանակը, որն այսօր է՝ երբևիցէ որևէ իշխանությունների մոտ չի եղել։ Իմ նախագահության ժամանակ ՏԻՄ-երին ուժային կառույցները ներգրավված չեն եղել։ Չեն եղել, որ նստեն մարզպետը, անվտանգության ներկայացուցիչը և ոստիկանապետը՝ ասեն «դու սա պետք է անես, դու՝ սա»։

Ի դեպ, սրա օրինակը հենց ՀՀ վարչապետի աթոռը զբաղեցնող անձն է տալիս, երբ անթաքույց ու հրապարակավ է անգամ հրահանգում իրավապահներին, մինչդեռ նման գործառույթ նա չունի։

Այսպիսով, այս և բազմաթիվ այլ՝ իրապես հանցավոր արարքների հանցակից է դառնում նաև ՀՀ գլխավոր դատախազությունը, քանզի այս կառույցը վերը նշված ապօրինության դրսևորում-փաստերի վերաբերյալ ոչ միայն քրգործեր չի հարուցում, այլև դրանք պարտակողի դերում է։ Եվ ուրեմն՝ բոլոր հանցանքներին հանցակից, դրանց համար՝ պատասխանատու։ Իսկ պատասխան տալու ժամանակը գալու է։

Հարցը, որ «Փաստինֆո» լրատվականը հաճախ է տալիս, նորից պիտի տանք՝ « Մի՞թե վերջիններս չեն պատկերացնում, որ պատասխան են տալու իրենց գործած հանցանքի համար»։

Այսօրինակ պաշտոնյաներին է ուղղված ՀՀ 2-րդ նախագահի խոսքը՝ « Ոչ մի իշխանություն հավերժ չի լինում։ Մի պահ է գալու՝ բոլոր հանցակիցները պատասխան են տալու այս ամենի համար։ Հիմա հրահանգ տվողը ենթադրում եմ, որ «թռնելու» է, բայց մյուսները մնալու են»։

Իսկ թե՝ «ես ընդամենը հրաման ու հանձնարարություն կատարող եմ» մտայնությամբ առաջնորդվելով վերին հրահանգներ կատարողները որքանո՞վ կլսեն տրված խորհուրդը, այն է՝ «Հասկանալի է, որ հրահանգներ են տալիս, բայց գիծ քաշե՛ք և ասե՛ք, որ ես որպես պաշտոնյա այդ գծից այն կողմ չեմ գնալու, որովհետև դրա համար գալու է պահը՝ ծանր պատասխան եմ տալու», ժամանակը ցույց կտա։

Նրանց տրված այս փոքրիկ շանսը, որ գուցե դարձի նեղլիկ արահետ է․․․

Աղբյուր` Փաստինֆո