Փաստ ինֆո

Երևանի քաղաքապետի առաջին տեղակալի պաշտոնում Լևոն Հովհաննիսյանի թեկնածությանը քվեարկելն ինձ համար արժեհամակարգի հարց է, որովհետև տեղի է ունենում արժեհամակարգերի բախում։ Երևանի ավագանու նիստի ժամանակ այս մասին ասաց ավագանու անդամ Իզաբելլա Աբգարյանը։

«Երբ մարդն իր պաշտոնի հավակնությունները չի կարողանում ստորադասել թիմի միասնությանը, քաղաքապետի հետ աշխատելու հանգստությանը, դա որակի և տեսակի մասին է խոսում»,-ասաց Իզաբելլա Աբգարյանը։

Վերջինս, անդրադառնալով այն քաղաքացիների հարցերին, թե արդյոք նա պատրաստվում է վայր դնել ավագանու անդամի մանդատը, նշեց, որ իր գործունեության ընթացքում մշտապես եղել է հաշվետու, թափանցիկ և պարտավորված է այսօր ևս հաշվետու կերպով ներկայացնել իր գործունեությունը։

««Իմ քայլը» դաշինքի ցուցակին միանալու համաձայնություն եմ տվել, քանի որ այն ժամանակ ցուցակը գլխավորում էր դեռ քաղաքապետի թեկնածու Հայկ Մարությանը։ Նրա հետ պայքար էի անցել Երևանի փողոցներում և գիտեի, որ իր սիրտն իսկապես ցավում է Երևանի համար։ Ամբողջ գործունեությանս ընթացքում սատարել եմ երևանցու, քաղաքի շահը։ Կարևոր է, որ երևանցին իմանա՝ քաղաքապետի կողմից ունեի մանդատ՝ բացելու ցանկացած դուռ»,-նշեց ավագանու անդամը։

Իզաբելլա Աբգարյանն ընդգծեց՝ նա ցանկանում էր վայր դնել մանդատը, երբ հեղափոխության օրակարգի սպասարկման հետ կապված մեծ խնդիրներ էի տեսնում, և տեսնում էր, որ երևանցիների խնդիրների պայքարի հարցում իր խմբակցությունն իր կողքին չէր կանգնում։
Ավագանու «Իմ քայլը» խմբակցության անդամներն ընդհատեցին Իզաբելլա Աբգարյանի խոսքը և դիմելով քաղաքապետին՝ ասացին, որ ելույթների համար ժամանակը պետք է հավասարաչափ բաշխվի։

Իզաբելլա Աբգարյանն էլ արձագանքեց՝ նշելով, որ իր ձայնը կտրողների վերջը լավ չի եղել։

«Խնդրում եմ չխոչընդոտել իմ շփումը երևանցիների հետ»,-ասաց Իզաբելլա Աբգարյանը։

Աղբյուր` Փաստինֆո