Փաստ ինֆո

Մենք շարունակում ենք մեր հակառակորդին պարտվել նաև քարոզչական պատերազմի մեջ: Ասուլիսի ժամանակ հայտարարեց երկրորդ նախագահ Ռոբերտ Քոչարյանը և հիշեցրեց, որ պատերազմի ժամանակ ոչ մի երկիր հանդես չեկավ գոնե մեկ դատարպարտող հայտարարությամբ այն պետության, որն սկսել է պատերազմը.

«Մենք պարտվում ենք նաև հիմա: Գիտե՞ք ում ենք պարտվում, գիտե՞ք ժողովրդավարության բաստիոնը ում է պարտվում, մի երկրի, որտեղ իշխանությունը ժառանգական է, որտեղ նախագահը նշանակում է փոխնախագահ իր կնոջը, որտեղ տասնյակ լրագրողներ բանտերում են, իսկ նախագահի ընտանիքը բոլոր օֆշորային սկանդալներում կա»,-ասաց նա:

Ռոբերտ Քոչարյանի արձանագրմամբ՝ Հայաստանն այս տարվա ընթացքում չի կարողացել միջազգային հանրությանը մոբիլիզացնել գերիների վերադարձն ապահովելու համար։

Ըստ՝ Ռ.Քոչարյանի Արցախի անվտանգության և ապագայի հետ կապված անորոշությունը մնացել է նույնը.

«Որոշակիություն մենք ստացել ենք վերջերս՝ Ղարաբաղի հարցի կարգավորման վերաբերյալ Հայաստանի դիրքորոշմանն առնչվող: Արդեն հասկանալի է՝ եթե վարչապետն ասում է, որ 2016 թվականից որևէ տեսական հնարավորություն այլևս չկար Ղարաբաղն Ադրբեջանից դուրս կարգավիճակի համար, սա Հայաստանի դիրքորոշումն է: Սա նշանակում է, որ Հայաստանը ձեռքերը լվացել է Ղարաբաղից ու այս վերջին հայտարարություններով վարչապետը, ըստ էության, կասկածի տակ դրեց Ղարաբաղի հռչակագիրը, որը Ղարաբաղի ձևավորման հիմքում է դրված. կամ չեն հասկանում՝ ինչ են անում, կամ անում են ծրագրավորված», - ասաց նա և ընդգծեց՝ Հայաստանը բոլոր ուղղություններով ունի կատարյալ ձախողում:

Աղբյուր` Փաստինֆո