Փաստ ինֆո

Թուրքիան միշտ երեք նախապայման է դրել Հայաստանի առջև՝ Ադրբեջանի տարածքային ամբողջականություն՝ ներառյալ Ղարաբաղը, 7 շրջանների անվերապահ վերադարձ և Ցեղասպանության ճանաչման հետ կապված էնտուզիազմի չդրսևորում, կամ՝ այլ կերպ ասած, այդ հարցը՝ փոխանցել պատմաբաններին: Հիմա ավելացել է «Զանգեզուրի միջանցքի» նախապայմանը: Այս մասին ասուլիսի ժամանակ ասաց Ռ.Քոչարյանը և պարզաբեց՝ ի՞նչ է կատարվել այդ երեք նախապայմանների հետ մինչ օրս.

«Ադրբեջանին ոչ թե 7 շրջանն է վերադարձվել, այլ բոնուսով՝ Շուշին ու Հադրութը: Ըստ էության, այդ նախապայմանն արդեն գոյություն չունի, քանի որ բոնուսով իրականացված է»,-ասաց նա:

Ինչ վերաբերվում է Ցեղասպանության հարցին՝ Ռոբերտ Քոչարյանը կարծում է, որ Հայաստանն այսօր այնքան թույլ է, որ չի կարող հաջողության հասնել Ցեղասպանության ճանաչման գործում.

«Միգուցե, հեռավոր ապագայում դա հնարավոր լինի, բայց այսօր Հայաստանի իշխանություններն այդ հարցն ամբողջությամբ թողել են Հայ Դատի գրասենյակների վրա։ Երկրորդ, կարող են նման հարցերի դիմել պետություններ, որոնք Թուրքիային պատժելու որոշակի շահագրգռություն այս կամ այն պահին կարող են ունենալ, այլ ռեսուրս չկա»,-ասաց Քոչարյանը՝ արձանագրելով, որ Թուրքիայի երեք նախապայմաններից երկուսն իրենց համար բարեհաջող լուծված են:

Ռոբերտ Քոչարյանը հիշեցրեց նաև Նիկոլ Փաշինյանի՝ ԱԺ-ում արված հայտարարությունը, թե 2016-ից այլևս չկա նույնիսկ տեսական տարբերակ Ղարաբաղի համար Ադրբեջանի կազմից դուրս և արձանագրեց՝ սա նշանակում է, որ ՀՀ առաջին դեմքն ասում է՝ ինքը չի տեսնում Արցախի որևէ կարգավիճակ՝ Ադրբեջանից դուրս.

«Հիմա երեք նախապայմաններն էլ կատարվել են, և երբ ասում են՝ մենք պատրաստ ենք Թուրքիայի հետ բանակցել առանց նախապայմանների, ավելի մեծ երեսպաշտություն դժվար է հորինել: Դուք բոլոր նախապայմանները կատարել եք, մի բան էլ ավել՝ քննարկում եք միջանցքի հարցը, սա է փաստը»,-ասաց Քոչարյանը:

Աղբյուր` Փաստինֆո