Փաստ ինֆո

Դատարանում վիճարկվում է «Լուսավոր Հայաստանին» մանդատ տալու հարցը և եթե դատարանը բավարարի հայցը, ապա «Մամիկոն Ասլանյան» դաշինքին բաժին կհասնի ոչ թե 15 մանդատ, այլ 14: Այս մասին այսօր լրագրողների հետ զրույցում նշել է Լոռու մարզպետ Արամ Խաչատրյանն՝ անդրադառնալով այն հարցին, որ Վանաձորի 33 հոգանոց ավագանու մանդատներից 15-ը «Մամիկոն Ասլանյան» դաշինքն է ստացել, ևս երկու մանդատ ստացել է «Հայրենիք» կուսակցությունը, և նրանք միասին կարող են համայնքապետ ընտրել, քանի որ 17 ձայնը 33 հոգանոց ավագանու մեջ որոշիչ կարող է լինել։

«Չի բացառվում, որ դատարանը չբավարարի ԼՀԿ-ի դիմումը, և այդ դեպքում ավագանու նիստում ուժերի հարաբերակցությունը կլինի 16-16։ Թե դրանից հետո ինչ կլինի, Աստված գիտի»:

Հիշեցնենք, որ այսօր նախատեսված էր Վանաձորի նորընտիր ավագանու առաջին նիստը, սակայն այն չկայացավ: Համայնքի աշխատակազմի քարտուղարի ժամանակավոր պաշտոնակատար Դավիթ Հակոբյանն ընթերցեց վերաքննիչ վարչական դատարանի որոշումը, ըստ որի՝ «Լուսավոր Հայաստան» կուսակցության հայցի հիման վրա միջանկյալ միջոց է կիրառվել, որով արգելվում է Վանաձորի ավագանուն այս ընթացքում ավագանու նիստ հրավիրել համայնքապետ ընտրելու օրակարգով:

Բացի այդ, պարզվեց, որ ավագանու 33 անդամից նիստին ներկայացել էր 16-ը, ինչի հետևանքով նիստը չկայացավ։

Նշենք, որ Դեկտեմբերի 5–ին Վանաձորի ավագանու ՏԻՄ ընտրություններում անցողիկ շեմը հաղթահարել էր 5 ուժ։ «Մամիկոն Ասլանյան» կուսակցությունների դաշինքը» ստացել էր 15 մանդատ, ՔՊ-ն՝ 9 մանդատ, «Հայաստանի սոցիալիստական աշխատավորական» կուսակցությունը՝ 5 մանդատ, «Հայրենիք» և «Ապրելու երկիր» կուսակցությունները՝ 2-ական:

Ընտրություններից մի քանի օր անց Մամիկոն Ասլանյանը հրավիրվել էր Քննչական կոմիտե և կալանավորվել։

Աղբյուր` Փաստինֆո