Փաստ ինֆո

Այսօր նախատեսված Վանաձորի նորընտիր ավագանու անդրանիկ նիստը չկայացավ: «Ասլանյան» դաշինքի անդամ Արթուր Օհանյանը նշեց, որ վարչական դատարանի որոշմանը՝ չանցկացնել ավագանու նիստ, ծանոթացել են նախապես հայտարարված նիստի ընթացքում։ Դաշինքի անդամները ավագանու նիստին պատշաճ ներկայացել էին ու աշխատակազմի քարտուղարի ժամանակավոր պաշտոնակատարը հայտնել է վարչական դատարանի որոշման մասին։

«Բովանդակությունը այդքան էլ չընկալեցի, բայց հասկացանք, որ վարչական դատարանը պարտավորեցրել էր Վանաձոր համայնքի ավագանուն և աշխատակազմին նիստ չգումարել»։

Այսօրվա նիստի օրակարգում երեք հարց էր՝ համայնքի ղեկավարի ընտրություն, երդմնակալություն, առաջիկա հերթական նիստի գումարման օր սահմանելու վերաբերյալ հարցերը։

«Հասկացանք, որ նիստը չի գումարվում, քանի որ Վանաձորի ավագանու երեք այլ խմբակցությունների ներկայացուցիչներ նախապես չէին ներկայացել նիստի։ Չգիտեմ ինչով էր դա պայմանավորված»,- ասաց Օհանյանը՝ հավելելով, որ կսպասեն դատարանի որոշմանը։

Վերջինս տեղեկացրեց՝ Վանաձոր համայնքը ունի կազուսային խնդիրներ, քանի որ կասեցված է համայնքի ղեկավարի ժամանակավոր պաշտոնակատարի լիզորությունները։ Համայնքի ղեկավար և պաշտոնակատար չկա։ Տարեվերջյան բյուջետային գործընթացի հետ կապված համայնքի, մարդկանց լիազորությունների և մի շարք այլ հարցերում առաջանում են վակում։ Դա լուծելու համար հրատապ պետք է ընտրվի համայնքի ղեկավար։

Օհանյանը՝ անդրադառնալով «Լուսավոր Հայաստանի» կողմից ներկայացված հայցադիմումներին, խուսափեց քաղաքական գնահատական տալ, հավելեց, որ թիմը եկել է Վանաձորին ծառայելու։

«Լուսավոր Հայաստանը տակտիկական ճիգեր է գործադրում, որպեսզի խաթարի այս գործընթացը։Մենք չենք ուզում նիշ փոխել մեր գործողություններով։ Չեմ ասի, որ մեր դաշինքի անդամների վրա ճնշումներ են գործադրվել։ Անկախ ամեն ինչից դաշինքը 13 հազար քվե է ստացել։ Վերջին իրադարձություններից և զարգացումներից հետո վստահ եմ՝ քվեները ավելացել են։ Նիստին գալով ցույց տվեցինք, որ մենք միահամուռ ենք»։

«Մամիկոն Ասլանյան» դաշինքը ստացել է 15 մանդատ։ Մյուս քաղաքական ուժերը ստացել են համամասնորեն՝ 9, 4, 2, 2 մանդատ։ Մամիկոն Ասլանյանը դաշինքը մյուս ուժերի հետ չի պատրաստվում հուշագիր ստորագրել, բայց դաշինքը ունենում է այլընտրանք՝ բոլոր չորս ուժերից որևէ մեկի հետ համագործակցել։ Բայց այլընտրանքի սկզբունքը խաթարվում է։ Քանի որ Մամիկոն Ասլանյանը կալանավայրում է, ուստի դաշինքը այս պահին ունի 14 մանդատ։

«Մեր առջև պայման է դրվում, որ դուք կամ առնվազն երկու քաղաքական ուժի հետ պետք է համագործակցեք, կամ այն ուժերի հետ, որոնք ունեն 5 կամ 9 մանդատ։ խաթարվել է ուղղակի այլընտրանքի սկզբունքը»։

Աղբյուր` Փաստինֆո