Փաստ ինֆո

2020-ը այդքան ամոթալի չէր անգամ պատերազմում պարտությամբ, նոյեմբերի 9-ով, իր կապիտուլյացիայով, որքան այս տարին։ 2021 թվականը Հայաստանի պատմության ամենաամոթալի տարին էր: Այսօր նման հայտարարությամբ է հանդես եկել ՀՀԿ փոխնախագահ Արմեն Աշոտյանը՝ «2022 թվական՝ Հայաստան. լինել, թե չլինել» խորագրով քննարկման ժամանակ:

«2021 թվականին է տեղի ունեցել հունիսի 20-ը, այն է՝ պարտություն բերած, իր ժողովրդին դավաճանած ղեկավարի վերարտադրության օրը: Սա շատ ամոթալի էջ է, խարան է: 2021-ին մենք դարձանք աշխարհում առաջին ժողովուրդը, որն ընտրեց Հուդային, իրեն դավաճանած մարդուն»,- նշել է Աշոտյանն ու արձանագրել, որ Հայաստանը երբեք այսքան խղճուկ չի եղել արտաքին քաղաքականության մեջ, երբեք այսքան խղճուկ չի եղել տարածաշրջանում, երբեք չի եղել աշխարհի հզորների սեղաններին պորտապար պարող քաղաքական դերակատար:

«Մեր պետականությունը Նիկոլ Փաշինյանի պատճռով վերածվել է թեթեւաբարո մի կնոջ, ով տալիս է բոլորին այն, ինչ նրանք ուզում են, փոխարենը ոչինչ չի կարող պոկել»,-ասել է Աշոտյանը:

Նրա արձանագրմամբ՝ տարին ամփոփում ենք՝ ունենալով քաղաքական բանտարկյալներ. Առ այսօր նստած են Աշոտ Մինասյանը, Մամիկոն Ասլանյանը, Արա Մկրտչյանը, Գառնիկ Իսագուլյանը, Առուշ Առուշանյանը, Նարեկ Մանթաշյանը:

«2022-ը կարող է լինել ավելի վատ տարի, կարող է լինել տարի, որի մեջ մեր ազատ անկումը կդադարի: Դա կախված է բացառապես ժողովրդից: Սա ասելով բացարձակապես ցանկություն չունեմ ժողովրդի գրպանը գցել պատասխանատվությունը: Պատասխանատվությունը քաղաքական, մտավորական վերնախավին է՝ մոբիլիզացնել, ոգեւորել մարդկանց, բացել աչքերը»,-ասաց Աշոտյանը՝ ավելացնելով, որ կեղծ լավատեսությունը ճոխություն է, որը հայերը չեն կարող իրնց թույլ տալ. «Նարկոտիկի նման մեր ազգի երակները սրսկվող կեղծ լավատեսությունն իրականում ճոխություն է, որը ինքներս մեզ չենք կարող թույլ տալ»,- ընդգծել է նա:

Աղբյուր` Փաստինֆո