Փաստ ինֆո

Հեղափոխությունը վերջացել է, մնացել են միայն հեղափոխության հետևանքները և այլանդակությունները, եւ այդ այլանդակությունները դառնալու են ավելի այլանդակ։ Այսօր նման գնահատականով է հանդես եկել «Այլընտրանքային նախագծեր» խմբի փորձագետ Վահե Հովհաննիսյանը՝ «2022 թվական՝ Հայաստան․ լինել, թե չլինել» քննարկման ժամանակ։

Պրոբլեմների հիմքում, ըստ նրա, այն է, որ Հայաստանը չի մտնում հետպատերազմյան փուլ: «Պատերազմից հետո մենք պետք է շատ արագ անցնենք ներքին փոփոխությունների՝ պետք է փոխենք ներքին օրակարգը, ներքին կառուցվածքը եւ ներքին մթնոլորտը: Մենք այդ երեքը չենք արել: Մենք չփոխեցինք իշխանություններին, չփոխեցինք ներքին օրակարգը: Մեր շուրջը բոլորը գիտեն ինչ են ուզում, բացի մեզնից: Սա աննորմալ ու վտանգավոր երեւույթ է»,- ասել է փորձագետը:

Նրա դիտարկմամբ՝ այսօր բոլորը խրախուսում են, որ Հայաստանը գնա զիջումների. «Եթե իմ նշած երկու բնութագրիչները չեն փոխվում, մենք ունենալու ենք շատ տխուր հեռանկար, պատկերավոր ասած, մենք Երեւան-Իգդիր մայրուղում թուրքական հետաքրքրություններ սպասարկող միավոր ենք դառնալու»,- ասել է նա:

Վ.Հովհաննիսյանի խոսքով՝ դինամիկ դեգրադացվող իշխանության պայմաններում ոչ իշխանական օրակարգը չի կարող լինել կայուն, սա այն ծուղակն է, որը հիմա ունենք: Այսօր ոչ իշխանական համակարգերը ոչ ֆունկցիոնալ են: Մենք ունենք փայլուն ընդդիմադիր միտք, բայց մեր ընդդիմադիր միտքը գերի է ընդդիմադիր ձեւաչափերին: Ավելին՝ նրա դիտարկմամբ՝ առկա է վտանգ, որ այսօրվա ընդդիմադիր խմբակցությունները կորցրել են կապը ոչ միայն լայն հասարակության, այլ նաև իրենց ընտրազանգվածի հետ, հետադարձ կապի խողովակը չկա։

«Կա սուր միջընտրազանգվածային երկխոսության խնդիր, և ովքեր հայտ կներկայացնեն այդ երխոսության, նրանք հաջողելու են և լինելու են հաջորդ իշխանությունը։ Հայաստանում այսօր առկա է երկու նոր քաղաքական ուժի անհրաժեշտություն»,-ասաց նա։

Աղբյուր` Փաստինֆո