Փաստ ինֆո

Ադրբեջանի վարչապետի հայտարարությունը նոր չէ։ Պարտադիր չէր բարձրաձայն հնչեր, որ նոր հասկանայինք իրենց նպատակները և ծրագրերը։ «Փաստինֆո»-ի հետ զրույցի ժամանակ ասաց Արցախի Հանրապետության Ազգային ժողովի պատգամավոր Մետաքսե Հակոբյանը։

Նրա խոսքով՝ վերջին մեկ տարվա ընթացքում ադրբեջանական կողմն անընդհատ սադրանքների էր դիմում, որի հատուկ նպատակն էր աշխարհին ցույց տալ, որ խաղաղապահները չեն իրականացնում իրենց գործառույթները։ Պատգամավորը կարծում է, որ ադրբեջանցիներն իրենց պահվածքով անընդհատ ցույց են տալու, որ գալու է ժամանակը և իրենք որոշիչ դեր են ունենալու խաղաղապահների հեռանալու հարցում։

«Իհարկե, միանշանակ, այնպես չէ, որ ադրբեջանական կողմի կոնկրետ պահանջով դա կարող է տեղի ունենալ, բայց Ադրբեջանն ապահովում է իր ծրագրի քարոզչությունն առ այն, որ հետ չի կանգնում Արցախի հարցի՝ ի նպաստ Ադրբեջանի լուծման տարբերակից»,-նշեց պատգամավորը։

Մետաքսե Հակոբյանն ասում է, որ ԱՀ նախագահ Արայիկ Հարությունյանի հետ յուրաքանչյուր հանդիպման ժամանակ հարց են բարձրացնում, թե ի՞նչ է լինելու, երբ 2025թ.-ի նոյեմբերի 9-ին լրանա խաղաղապահների տեղակայման ժամկետը։

«Արցախի իշխանություններն էլ, կարծեք թե, իրենց լուռ համաձայնությամբ վարում են այն քաղաքականությունը, ինչ Հայաստանն է վարում և լծված են միայն սոցիալ-տնտեսական ծրագրերին։ Արցախն այսօր դուրս է մնացել քաղաքական դաշտից։ Հայաստանի իշխանությունները ձեռք են քաշել, իսկ Արցախի իշխանությունները բացարձակ որևէ քայլ չեն անում այդ ուղղությամբ։ 90-ականներից հետո սա առաջին դեպքն է, երբ Արցախը որևէ քաղաքական ձևակերպումների մեջ ընդհանրապես չկա»,-ասաց Մետաքսե Հակոբյանը։

ԱՀ իշխանություններն անպատասխան են թողնում արցախցիների համար այդքան կարևոր հարցը, թե ինչ կլինի, երբ խաղաղապահների տեղակայման ժամկետը լրանա։ Մետաքսե Հակոբյանի խոսքով այս պահի դրությամբ որևէ բան չի փաստում այն մասին, որ Արցախի իշխանություններն աշխատում են այդ ուղղությամբ։

Հարցին՝ հնարավոր համարու՞մ է, որ չորս տարի հետո հայկական կողմը նույնպես խաղաղապահների դեմ դուրս գա, ԱՀ ԱԺ պատգամավորը նկատեց՝ ինչո՞ւ պետք է չմտածեն, որ չորս տարի հետո կարող է լինել այն, ինչն ամենաշատն է այս պահին անհանգստացնում։ Եթե անվտանգային խնդիրը չլուծվի, չենք կարող պայքարել մեր ինքնորոշման միջազգային ճանաչման ուղղությամբ, և ցանկացած պայքար, Մետաքսե Հակոբյանի կարծիքով, անիմաստ է։

« Դա հավանական տարբերակ է, և որևէ մեկը դա չի բացառում։ Հստակ ծրագիր չկա, թե ինչ է լինելու չորս տարի հետո։ Այդ ուղղությամբ որևէ աշխատանք չի տարվում։ Այն հայտարարությունները, որ ռուս խաղաղապահներն անժամկետ այստեղ են լինելու, դա ևս իր մեջ վտանգ է պարունակում։ Դրա փաստերով այս իշխանությունները նաև հասկացնում են, որ շատ քիչ կամ ընդհանրապես հավանականություն չկա Արցախի հարցի հայանպաստ կարգավորման։ Այսինքն՝ ռուս խաղաղապահներն այնքան են այստեղ՝ մինչև Արցախի ժողովրդի ինքնորոշման հարցը լուծվի»,-ասաց պատգամավորը։

Անդրադառնալով այն տեղեկություններին, որ Ադրբեջանի ԱԳՆ-ն դիմել է Google-ին՝ պահանջելով Արցախի բնակավայրերի հայերեն անվանումները հեռացնել, Մետաքսե Հակոբյանը նշեց, որ ադրբեջանական քարոզչությունը միջազգային հարթակներում միշտ ակտիվ են եղել, մինչդեռ մենք միշտ պարտվել ենք այդ հարցում։

«30 տարիների ընթացքում իրենք շատ ավելի հզոր քարոզչամեքենա են ունեցել։ Նրանք կարողացել են այդ հարցում ևս հաղթող լինել, իսկ հիմա երբ հաղթողի կողմից են խոսում, ավելին են կարողանում անել։ Դա էլ այս պարագայում պիտի նորմալ ընկալելի լինի։ Այլ բան է, որ մենք դրան պատասխան չենք տալիս։ Մենք նույնպես տեսնում ենք իրենց այս քարոզչամեքենայի աշխատանքը, տեսնում ենք՝ ինչպես է դա հասնում աշխարհին, բայց մենք երբեք չենք տեսնում, թե ինչ են անում մեր իշխանություններն ի նպաստ Արցախի, հայության»,-ասաց Մետաքսե Հակոբյանը։

Աղբյուր` Փաստինֆո