Փաստ ինֆո

Պաշտոնապես ասում եմ՝ ես դուրս եմ եկել «ՔՊ» կուսակցությունից, բայց դուրս չեմ եկել «Իմ քայլը» դաշինքից, շարունակում եմ մնալ «Իմ քայլը» խմբակցության անդամ և նախաձեռնող խմբի այս պնդումն ուղղակի կեղծիք է։ Այս մասին Երևանի ավագանու արտահերթ նիստին ասաց քաղաքապետ Հայկ Մարությանն՝ անդրադառնալով իրեն անվստահություն հայտնելու նախաձեռնության հիմքում դրված այն պնդումներին, թե ինքը դուրս է եկել «ՔՊ»-ից և «Իմ քայլ»-ից, հետևաբար, չի կարող լինել քաղաքապետ։ 

Մարությանն ընդգծեց, որ նախաձեռնողներն իրենց փաստարկներում հիշատակելով «ՔՊ» անունը՝ փորձում են սեփականաշնորհել հեղափոխությունը, փորձում են «ՔՊ»-ն դարձնել հեղափոխական արժեքների միակ կրողն ու ժառանգորդը, ինչն անընդունելի է իր և իր նման հազարավոր մարդկանց համար, որոնք հեղափոխություն են արել՝ հանուն ավելի լավ Հայաստանի երազանքի։

Ավելին, Մարությանը նշեց, որ «ՔՊ»-ականներն ավելի առաջ են գնացել, իրենք արդեն առաջ են տանում այն թեզը, թե ով «ՔՊ»-ից չէ՝ դեմ է հեղափոխությանը, ով «ՔՊ»-ից չէ՝ սատարում է հակահեղափոխական ուժերի, ինչը նույնպես անընդունելի է և վիրավորական այն քաղաքացիների համար, որոնք «Քաղաքացիական պայմանագիր» կուսակցության անդամ չեն։

Աղբյուր` Փաստինֆո