Փաստ ինֆո

Ավագանու մի ահռելի խմբակցություն այսօր հայտարարում է, որ խնդիրներ է ունեցել քաղաքապետի հետ կամ ուղղակի վերևից հրահանգ է իջեցվել և այսօր եկել են իրենց սիրած «Կարգին Հայկո»-ին պաշտոնանկ անելու։ Այդպես էլ չեմ հասկանում՝ «Կարգին Հայկոն» ինչպես մեկ գիշերում վերածվեց «Անկարգ Հայկո»-ի։ Այս մասին լրագրողների հետ զրույցում ասաց Երևանի ավագանու «Լույս» խմբակցության անդամ Թեհմինա Վարդանյանը։ 

Վարդանյանը հիշեցրեց, որ ինքը երեք տարիների ընթացքում բազմաթիվ անգամներ ելույթներ է ունեցել, երևի թե քաղաքապետի հետ ամենաշատը լեզվակռիվների մեջ մտած ավագանու անդամն է եղել և, չգիտես ինչու, այսօր «Քաղաքացիական պայմանագիր» կուսակցության ավագանու անդամների համար իր երեք տարիների հիմնավորումները դարձան շատ կարևոր։

«Կամ իրենք շատ դանդաղ են, այսինքն՝ երեք տարվա ընթացքում նոր մարսում են, օրինակ, կամազների հետ կապված առերևույթ կոռուպցիան, ինչի մասին բազմաթիվ անգամ բարձրաձայնել ենք։ Իրենք կա՛մ դանդաղ են, կա՛մ ունեն իջեցված հրահանգ։ Այսօր արդեն կանգնում ասում են, որ կոռուպցիոն թաթախվածություն կարող է լինել, քաղաքապետն իրենց խոսքը բանի տեղ չի դնում, որ մի քանի անգամ փորձել են բոյկոտել նիստը»,- նշեց Վարդանյանը՝ հավելելով, որ դա խոսում է այդ քաղաքական թիմի ոչ թիմային լինելու մասին։  Մարդիկ, որոնք հայտնվել են դահլճում փողոցից, փաբերից կամ այլ կետերից, իրար հետ էլ չեն առնչվում, իրար դեմքով էլ չեն ճանաչում, սակայն շատ ցավալի և նողկալի է, որ երեք տարի շարունակ լսել է այլ բան, իսկ այսօր նիստում լսում բոլորովին այլ բան և հասկանում, որ մարդիկ ինչ տեսակ կարող են լինել։ Այսինքն՝ սեփական քաղաքապետին, որին պաշտոնում առաջադրել էին, մեկ հրահանգով և մեկ օրում կարող են «գցել» և վրայով անցնել։

Աղբյուր` Փաստինֆո