Փաստ ինֆո

Այսօր տեղի է ունենում մի պրոցես, որը երբեք տեղի չի ունեցել Երևանի պատմության մեջ։ Սա առաջին դեպքն է, երբ Երևանի քաղաքապետին անվստահություն են հայտնում։ Այս մասին ավագանու նիստի ընթացքում ասաց Երևանի քաղաքապետ Հայկ Մարությանը։

«Կարծես թե այսպիսի բան անելու համար նախաձեռնողները պետք է շատ ծանրակշիռ փաստարկներ ունենային՝ ընդդեմ քաղաքապետի, օրինակ՝ բյուջեի խոշոր չափերի գումարների հափշտակում կամ աշխատանքային, կենցաղային զարհուրելի հանցանք, բայց ինչպես հասկացանք ելույթներից՝ այդպիսիք չկան։ Ներկայացվող հիմնական պատճառը լրիվ այլ է։ Ինչպես նախաձեռնող խումբն է ասում՝ քանի որ ես դուրս եմ եկել «ՔՊ» կուսակցությունից, պետք է լքեմ նաև այս պաշտոնը»,- նշեց Մարությանը։

Քաղաքապետը հիշեցրեց, որ 2018թ Հայաստանի ժողովուրդը հեղափոխություն իրականացրեց, որին բոլորը մասնակից են եղել և յուրաքանչյուրն իր լուման է ներդրել այդ կարևոր գործում։ Հեղափոխությունից հետո առաջին ընտրությունները Երևանի ավագանու ընտրություններին էին, որտեղ իրենք՝ որպես քաղաքական թիմ խնդիր ունեին ջախջախիչ հաղթանակ տանելու և թղթի վրա հստակ ամրագրելու ժողովրդի կամքը, ինչն էլ թույլ կտար գնալ ԱԺ ընտրություններին և ամրագրել այդ հաղթանակը, ինչի նպատակով էլ ստեղծվեց հեղափոխական «Իմ քայլը» դաշինքը։

Մարությանի դիտարկմամբ՝ ավագանու կազմում «Իմ քայլը» դաշինքով ընտրված առաջին 57 անդամներից միայն 27-ն էին այդ պահին «Քաղաքացիական պայմանագիր» կուսակցության անդամ, այսինքն, խմբակցության մեծ մասը՝ 30 ավագանու անդամն անկուսակցականներ էին կամ այլ կուսակցության անդամներ, ինչը, ըստ Մարությանի, հատկանշական տվյալ է, որն արտացոլում է հեղափոխական թիմի իրական պալիտրը։

«Ընտրությունների արդյունքում մենք ունեցանք համոզիչ հաղթանակ՝ հավաքելով ձայների մոտ 80 տոկոսը։ Ժողովուրդն իր ձայնը չտվեց որևէ կուսակցության, ժողովուրդն իր ձայնը տվեց «Իմ քայլը» դաշինքին, իր ձայնը տվեց հեղափոխությանը, հեղափոխական թիմին, հեղափոխության լիդեր Նիկոլ Փաշինյանին, քաղաքապետի թեկնածու Հայկ Մարությանին, թիմում ընդգրկված հայտնի և հարգված մարդկանց՝ Արթուր Իսպիրյանին, հայտնի ճարտարապետ Արսեն Կարապետյանին, հայտնի բլոգեր Իզաբելլա Աբգարյանին»,-նշեց Մարությանն՝ ընդգծելով, որ հեղափոխական թիմը ընտրությունների չգնաց «ՔՊ» կուսակցության դրոշի ներքո՝ ոչ միայն նրա համար, որ հեղափոխությունը արեց ամբողջ ժողովուրդը, այլ նրա համար, որ «Քաղաքացիական պայմանագիր» կուսակցություն անունը լայն զանգվածներին այն ժամանակ ուղղակի ծանոթ չէր։

Մարությանն արձանագրեց, որ 2018թ Երևանի քաղաքապետի ընտրությունների ժամանակ ժողովուրդն ընտրեց «Ւմ քայլը» հեղափոխական դաշինքը։

Աղբյուր` Փաստինֆո