Փաստ ինֆո

Ինձ հայտնի չէ, թե ինչու Հայկ Մարությանը դուրս եկավ ՔՊ-ից, բայց կարող եմ հասկանալ։ Ինքս էլ 2020թ.-ի գարնանը հենց հայտարարել էի, որ դուրս եմ գալու, քանի որ գտնում էի՝ հեղափոխական կուսակցությունը չի սպասարկում հեղափոխության օրակարգը։ News.am-ի հետ զրույցի ժամանակ ասաց Երևանի ավագանու անդամ Իզաբելլա Աբգարյանը։

«Հիշում եմ Հայկ Մարությանի նյարդային վիճակը, երբ գալիս էր մեզ հետ հանդիպման և ավագանու խմբակցությունը քվորում չէր ապահովում, որ կարողանայինք խորհրդատվական մեր կարծիքը հայտնել։ Այն ժամանակ Հայկ Մարությանը դեռ ՔՊ-ի անդամ էր, ՔՊ վարչությունը նույնիսկ շատ լավ հարաբերությունների մեջ էր քաղաքապետի հետ։ Հայկ Մարությանն խնդրում էր միջոցներ ձեռնարկել, որ մարդիկ ներկայանան խմբակցության նիստին և կարողանանք քննարկումներ անցկացնել»,-նշեց Իզաբելլա Աբգարյանը։

Ավագանու անդամը լրագրողներին հորդորեց պահանջել նիստերի արձանագրություններն ու տեսնել, թե ովքեր են միշտ ներկա եղել խմբակցության նիստերին, փորձել աշխատել քաղաքապետի հետ։

Իզաբելլա Աբգարյանը նկատում է՝ երևի չար կատակ է, բայց նիստերին մասնակցող մարդիկ հիմնականում նրանք են, որոնք այսօր դեմ են Հայկ Մարությանի հրաժարականին։

«Մարդիկ, որոնք 2 տարի շարունակ կա՛մ չէին գալիս խմբակցության նիստերին, կա՛մ գալիս, հեռախոսի մեջ էին մտնում, որևէ առաջարկ չէին անում քաղաքապետին, որևէ հարց չէին բարձրաձայնում, նրանք այսօր փորձում են որոշել, թե ով է լինելու Երևանի քաղաքապետը»,-ասաց Իզաբելլա Աբգարյանը։

Դիտարկմանը, որ լուրեր էին շրջանառվում, թե Հայկ Մարությանը հանդիպել է ՀՀ երկրորդ նախագահ Ռոբերտ Քոչարյանի հետ, Իզաբելլա Աբգարյանը նկատեց՝ դա կեղտոտ, ցածր ու ստոր մեթոդ էր։ Նրա կարծիքով ՔՊ-ն այսօր միայն մեկ խաղաքարտ ունի, որն իրեն օգնում է ժողովրդի համակրանքը դեպի իրենց ուղղել։ Դա ինչ-որ մեկին նախկինների հետ համադրելը և նախկիններով վախեցնելն է։

«Ինձ համար դա ստորություն է։ Ես մի մարդ եմ, որը պայքարել է և՛ Ռոբերտ Քոչարյանի օրոք, և՛ Սերժ Սարգսյանի օրոք, և չեմ վախենում նրանցից, քանի որ տեսել եմ իմ պայքարի արդյունքը։ Տեսել եմ, որ եթե ժողովուրդը համախմբված է լինում և վստահ է իր ուժերի մեջ, որևէ երկրի ղեկավար կամ կուսակցություն այլևս չի կարողանալու շարունակել իր պաշտոնավարումը։ Այս ժողովուրդն անարդարություն չի հանդուրժելու։ Նույնիսկ համարձակվել էին անկուսակցական անդամներին ասել, որ վայր դրեք ձեր մանդատները, եթե պետք է այդ օրը դեմ հանդես գալ»,-ասաց Իզաբելլա Աբգարյանը։

Վերջինս հավելեց, որ այս իշխանությունների նպատակն է հնարավորինս հնազանդ, խամաճիկ մարդ ունենալ։

Աղբյուր` Փաստինֆո