Փաստ ինֆո

Երևանի ընդհանուր իրավասության դատարանում՝ դատավոր Աննա Դանիբեկյանի նախագահությամբ, մեկնարկել է ՀՀ երկրորդ նախագահ Ռոբերտ Քոչարյանի և ՀՀ նախկին փոխվարչապետ, ԱԺ «Հայաստան» խմբակցության պատգամավոր Արմեն Գևորգյանի գործով դատական նիստը։

«Փաստինֆո»-ի թղթակցի հաղորդմամբ՝ դատական նիստին Արմեն Գևորգյանի պաշտպանը միջնորդություն ներկայացրեց՝ պահանջելով վերացնել Գևորգյանի՝ սահմանային շարժի արգելքը և թույլատրել Գևորգյանին՝ մեկնել Ստրասբուրգ։

Պաշտպան Լուսինե Սահակյանը հայտնեց, որ դատարանի կողմից Գևորգյանի՝ երկրից դուրս գալու հնարավորությունը սահմանափակող որոշման պատճառով նրան չի հաջողվել մասնակցել դեկտեմբերի 14-ին կայացած ԵԽԽՎ Մոնիթորինգի հանձնաժողովի նիստին։

Պատգամավորը չի կարողացել նույնիսկ հեռավար մասնակցել, քանի որ հենց այդ նույն ժամին՝ Երևանի ժամանակով 13։00-ին դատական նիստն էր նշանակված։

Արմեն Գևորգյանն էլ արձանագրեց՝ ԵԽԽՎ նիստում իր դիրքորոշումը հայտնելու հնարավորությունը տապալվել է։

Գևորգյանի պաշտպան Լուսինե Սահակյանը, ներկայացնելով միջնորդությունը, հայտնեց, որ հունվարի 24-28-ը Ստրասբուրգում տեղի է ունենալու ԵԽԽՎ հերթական նստաշրջանը, որին Գևորգյանը՝ որպես ՀՀ ԱԺ ընդդիմադիր պատգամավոր, պետք է ներկա լինի։ Փաստաբանը հիշեցրեց նաև պատգամավորական անձեռնմխելիության մասին, ինչն ամրագրվել է նաեւ ՍԴ վերջին որոշման մեջ։

Պաշտպանական կողմը խնդրեց նշված օրերին դատական նիստեր չնշանակել և սահմանային տեղաշարժի արգելքը վերացնել։

Մեղադրող դատախազ Գևորգ Բաղդասարյանն առարկեց, նշելով, որ ներկայացված միջնորդության հիմնավորումները խեղաթյուրում են ՍԴ որոշումը։ Բաղդասարյանի խոսքով՝ ՍԴ որոշման մեջ խոսվում է պատգամավորի անձեռնմխելիության մասին, ինչը կապ չունի Արմեն Գևորգյանի հետ, քանի որ վերջինս չի օգտվում պատգամավորական անձեռնմխելիությունից, քանի որ սահմանադրական կարգավորումները վերաբերում են քրեական հետապնդում հարուցելու կապակցությամբ անձեռնմխելիությանը։

«Կոնտեքստից կտրել ՍԴ որոշման մեջ առկա դիրքորոշումները և ներկայացնել որպես ԱԺ պատգամավորի գործունեության հնարավորություններն անսահմանափակ դարձնելու միջոց՝ ճիշտ չէ»,- նշեց Բաղդասարյանը։

Ըստ դատախազի՝ պաշտպանության կողմը դատական քննությունը մեկնաբանում է որպես պատգամավորական գործունեության արտաքին միջամտություն։

«Արդյո՞ք ՍԴ դիրքորոշումը, ըստ պաշտպանության կողմի, նշանակում է, որ ԱԺ պատգամավորը՝ պատգամավորական գործունեության հետ կապված ցանկացած պատճառով կարող է դատական նիստին չներկայանալ կամ խնդրել հետաձգել դատական նիստը»,- հայտարարեց Բաղդասարյանը։

Դատախազի առարկություններին ի պատասխան Արմեն Գևորգյանը հայտարարեց, որ դատախազությունն անհարգալից վերաբերմունք է դրսևորում խորհրդարանի և ժողովրդի քվեն ստացած պատգամավորների նկատմամբ։ Նա նաև հիշեցրեց, որ ընդամենը մի քանի ամսվա ընթացքում ՍԴ-ն հակասահմանադրական և ապօրինի ճանաչեց այն մեղադրանքները, որոնք պաշտպանում էր դատախազությունը։

«Անկախ նրանից, ենթարկվում է պատգամավորը քրեական հետապնդման թե՝ ոչ, պետք է ստեղծել պայմաններ, որ այդ գործընթացը չխանգարի ԱԺ-ի բնականոն գործունեությանը, որպեսզի պատգամավորն իր լիազորությունները լիարժեք կատարի», - նշեց Արմեն Գևորգյանը։

ՀՀ երկրորդ նախագահ Ռոբերտ Քոչարյանն էլ, անդրադառնալով դատախազի մեկնաբանությանը, արձագանքեց՝ նշելով, որ իրեն ապշեցնում է ՍԴ որոշումներն աբսուրդի հասցնելը, անհեթեթ բաներ են ասվում։

Լսելով կողմերի դիրքորոշումը՝ դատարանը որոշեց հետաձգել միջնորդության լուծումը՝ նշելով, որ պաշտպանական կողմն այս պահի դրությամբ ոչ ամբողջական տեղեկատվությունն է տրամադրել։ Խոսքը գնում է ԱԺ նախագահի գրության մասին, որտեղ պետք է նշվեն ՀՀ-ից մեկնելու և վերադառնալու հստակ ամսաթվերը։

Դատական նիստը հետաձգվեց՝ մինչև 2022թ հունվարի 18-ը, ժամը՝ 13.00-ն։

Հիշեցնենք, որ նշված դրվագով Ռոբերտ Քոչարյանը մեղադրվում է առանձնապես խոշոր չափերով կաշառք ստանալու, իսկ Արմեն Գևորգյանը՝ առանձնապես խոշոր չափերով կաշառք ստանալու և հանցավոր ճանապարհով ստացված գույքն օրինականացնելու մեջ։

Հեղինակ՝ Իզաբել Սահակյան

Աղբյուր` Փաստինֆո