Փաստ ինֆո

Անթույլատրելի է հրապարակային դաշտում խոսել գերիների նկատամամբ քրեական հետապնդումների մասին։ Իրավական և բարոյական առումով չեմ կարծում, որ նրանց կալանավորելու հիմքեր գոյություն ունեն։ Նրանց առողջական վիճակը և այլ հանգամանքներն իսկապես չեն արդարացնում անազատությունը։ Չեմ տեսնում նաև ռիսկեր՝ նրանց փախուստի դիմելու, քննությունից թաքնվելու կամ քննությանը խոչընդոտելու առումով։ Այս մասին լրագրողների հետ զրույցում ասաց իրավապաշտպան Սիրանուշ Սահակյանն՝ անդրադառնալով հայրենադարձված գերիների նկատմամբ իրականացվող քրեական հետապնդումներին։ 

«Եթե նրանք փախուստի դիմելու նպատակ ունենային, ուղղակի կտեղափոխվեին երրորդ երկրներ՝ իրենց կամարտահայտության հիման վրա։ Նրանք հիմնականում գալիս են խոցելի վիճակում, ընտանիքները գտնվում են ծանր՝ բարոյական, նյութական վիճակում և չեմ կարծում, որ իրատեսական է այս անձանց կողմից վարչական ռեսուրսներ իրացնող սուբյեկտների գործունեությանը միջամտելը»,-նշեց Սահակյանն՝ ընդգծելով, որ անկախ իրենց մեղսագրվող արարքներից՝ նրանք պետք է մնան ազատության մեջ, նրանց նկատմամբ պետք է այլ խափանման միջոցներ կիրառվել և հանգամանալից քննության արդյունքում կարող ենք խոսել, թե ինչ արարքներ են կատարվել, դրանք հիմնավոր են, թե ոչ։

Սահակյանը նաև արձանագրեց, որ ինչպես և կանխատեսվում էր՝ Ադրբեջանը դա շահարկելու էր և Ադրբեջանը հայտարարել է, որ իրենք վերադարձնում են հայ ռազմագերիներին, մինչդեռ այստեղ իրենց ձերբակալում են, խոշտանգում են։ Սահակյանի գնահատմամբ՝ այս հայտարարությունը երկարաժամկետ է, կարճ ժամանակ անց միջազգային ատյաններում կարող ենք տեսնել, թե ինչպես են կասկածի տակ դրվում գերիների ցուցմունքները քննչական մարմիններին, որտեղ նրանք հայտնել են խոշտանգումների մասին։

«Ադրբեջանը փորձելու է ներկայացնել, որ նրանց ձերբակալում են, կալանավորում են, խոշտանգում են և ստանում են Հայաստանին արժանի ցուցմունքներ և իրականում այդ անձինք ոչ թե խոշտանգվել են, այլ՝ ՀՀ իշխանությունների սպառնալիքի ներքո տվել են սուտ ցուցմունքներ՝ խոշտանգումների մասին»,- նշեց Սահակյանը։

Աղբյուր` Փաստինֆո