Փաստ ինֆո

Ռուբեն Ռուբինյանը դրվել է, որպեսզի Հայաստանը զիջումներ անի, եթե այդ զիջումներն անհանգստություններ առաջացնեն երկրի ներսում և նոր խնդիրներ ի հայտ գան, ապա այդ ամենի պատասխանատվությունը Նիկոլ Փաշինյանը Ռուբինյանի գլխին է ջարդելու՝ որպես քավության նոխազ: «Փաստինֆո»-ի հետ զրույցում նման դիտարկում արեց քաղաքագետ Ալեն Ղևոնդյանն՝ անդրադառնալով հայ-թուրքական բանակցություններում որպես հայկական կողմի բանագնաց Ռուբեն Ռուբինյանի նշանակմանը:

Քաղաքագետի արձանագրմամբ՝ Ռուբեն Ռուբինյանի նշանակումը նման կարևոր պաշտոնին Հայաստանին հերթական ձախողումն է տալու, որը պատմականորեն ժառանգություն կմնա Հայաստանի հաջորդ իշխանությունների:

Ալեն Ղևոնդյանը նկատեց՝ ինչպես ցանկացած նշանակման դեպքում, այս դեպքում էլ իշխանությունը շարժվել է ոչ թե տվյալ անձի հմտություններով և փորձառությամբ, այլ այն հանգամանքով, որ լինի ՔՊ-ի անդամ և լոյալ լինի քաղաքական թիմին:

Ըստ զրուցակցի՝ Նիկոլ Փաշինյանը կրկին պաշտոնի է նշանակում մարդու, որի վրա հնարավոր կլինի բարդել հետագայում հնարավոր զիջումները և ձախողումները.

«Ակնհայտ է, որ Ռուբեն Ռուբինյանը բանակցություններից հեռու է, իսկ Թուրքիայի բանագնացը բարձր մակարդակի մասնագետ է, թուրքական դիվանագիտությանն անգամ գերտերությունները չեն կարողանում դիմագրավել, հիմա Փաշինյանն այս երիտասարդին է նշանակել այդ պաշտոնին, որպեսզի եթե ինչ-որ փուլում ձախողումներ կամ խնդիրներ լինեն, նրա գլխին ջարդի այդ ամենը: Նիկոլ Փաշինյանը նախապես նշանակում է մարդկանց, որոնք հաստատ ձախողելու են գործընթացը, իսկ դա իրեն լեգիտիմացնելու է»,-ասաց Ալեն Ղևոնդյանը և նկատեց՝ Նիկոլ Փաշինյանն իր համար վստահելի և կառավարելի սուբյեկտի է նշանակել այդ կարևոր պաշտոնին, որպեսզի ստանա անհրաժեշտ տեղեկությունները բանակցային գործընթացից, ինչպես նաև կառավարի բանակցությունների վերաբերյալ տեղեկությունների արտահոսքը.

«Պարզ է, որ բանակցողն այդ երկիտասարդը չի լինելու, ինքն այնտեղ քարտուղարի կամ մունետիկի դեր է խաղալու, բանակցություններն ընթանելու են Նիկոլ Փաշինյանի, մյուս կողմից՝ Թուրքիայի և Արբեջանի ղեկավարության միջև։ Այսինքն՝ ի դեմս Ռուբեն Ռուբինյանի, մենք ունենք տեխնիկական նշանակում, քանի որ երիտասարդն անգամ անհրաժեշտ գիտելիքներ չուներ՝ ԵԽԽՎ-ում քվեարկության սեղմակների գույները տաբերելու համար»,-ասաց Ղևոնդյանը:

Հարցին՝ որքանո՞վ է այդ նշանակումը համատեղելի ԱԺ փոխնախագահի պաշտոնի հետ, քաղաքագետը պատասխանեց.

«Քանի որ, մեծ հաշվով մենք ԱԺ ինստիտուցիոնալ մարմին չունենք, ԱԺ-ն ավելի շատ ՝ գործադիրի ղեկավարին կից նոտարական գրասենյակի դերակատարում ունի, անգամ եթե ԱԺ նախագահը նշանակվեր այդ պաշտոնին, դրանից մեծ հաշվով ոչինչ չէր փոխվելու ԱԺ գործունեության մեջ, բայց կարծում եմ՝ ԱԺ փոխխոսնակի գործառութային նկարագիրը հակասության մեջ չի մտնում այսպիսի պրոցեսում ներգրավվածության մասով, բայց պետք է հասկանալ՝ բանագնացները գործադիրի՞ց պետք է լինեն, թե՞ օրենսդիրից, իմ կարծիքով՝ մեծ սկզբունքայնություն չկա»,-ասաց քաղաքագետը:

Նշենք, որ Թուրքիան Հայաստանի հետ բանակցություններում ներկայացուցիչ է նշանակել ԱՄՆ-ում երկրի նախկին դեսպան Սերդար Քըլըչին, որը փորձառու դիվանագետ է և մշտապես պայքարել է Ցեղասպանության ճանաչման դեմ:

Ալեն Ղևոնդյանի արձանագրմամբ՝ երկու կողմի բանագնացների մասնագիտական հմտություններն անհամեմատելի են.

«Թուրքական կողմի ներկայացուցիչը դասեր է կարդալոու Ռուբեն Ռուբինյանի համար, մասնագիտական և փորձառության մասով համեմատելի չեն, թուրքական բանագնացի միայն դիվանագիտական փորձն ավելին է քան  Ռուբեն Ռուբինյանի կյանքի փորձը»,-ասաց քաղաքագետը:

Աղբյուր` Փաստինֆո