Փաստ ինֆո

Ընդդիմության՝ Պաշտպանության և անվտանգության հարցերի մշտական հանձնաժողով փոխնախագահի թեկնածուն շարունակում է մնալ Արթուր Ղազինյանը: «Փաստինֆո»-ին այս մասին հայտնեց «Հայաստան» խմբակցության քարտուղար Արծվիկ Մինասյանը

Այսպիսով՝ Պաշտպանության և անվտանգության հարցերի մշտական հանձնաժողովը վաղն արտահերթ նիստում կրկին քննարկելու է հանձնաժողովի փոխնախագահի ընտրության հարցը: «Հայաստան» խմբակցությունն այս պաշտոնին 14 անգամ առաջադրել է Արթուր Ղազինյանի թեկնածությունը, իսկ ԱԺ մեծամասնությունը 14 անգամ մերժել է նրան; Հանձնաժողովի նախագահ Անդրանիկ Քոչարյանը հայտարարել է, որ եթե ընդդիմադիր խմբակցություններն այլ թեկնածու չառաջադրեն, ապա թեկնածուի առաջադրման իրավասությունն անցնում է ԱԺ մեծամասնությանը՝ «Քաղաքացիական պայմանագիր» խմբակցությանը:

«Փաստինֆո»-ին Արծվիկ Մինասյանը հայտնեց, որ ընդդիմության որոշումն անփոփոխ է , իրենց թեկնածուն շարունակում է մնալ Արթուր Ղազինյանը, իսկ որոշման վերանայման համար որևէ պատճառ չի տեսնում.

«Կանոնակարգ օրենքը նախատեսում է հստակ մոտեցում, խմբակցության որոշմամբ առաջադրվել է թեկնածու, մեր թեկնածուն Արթուր Ղազինյանն է, ընդդիմադիր երկու խմբակցությունները հայտարարել են, որ պաշտպանում են Ղազինյանի թեկնածությունը, և որևէ այլ պատճառ չկա՝ մեր որոշումը վերանայելու համար»,-ասաց Մինասյանը;
Արծվիկ Մինասյանը միևնույն ժամանակ ընդգծեց՝ Անդրանիկ Քոչարյանի հայտարարությունը առ այն, որ եթե ընդդիմությունը նոր թեկնածու չառաջադրի, ՔՊ-ին է անցնելու այդ լիազորությունը, ապօրինի է.

«Ապօրինի կլինի նրանց կողմից նման վարքագծի դրսևորումը, իրենք այդ իրավունքը չունեն, եթե ուզում են ամեն գնով շարունակել իրենց ապօրինի վարքագիծը և այս պաշտոնը փորձում են ընդդիմության ձեռքից խլել, դրան գնահատական կտրվի»,-ասաց Մինասյանը և հավելեց. «Եթե հանկարծ ՔՊ-ն Անդրանիկ Քոչարյանի ձեռքով փորձի ընդդիմադիր խմբակցություններից այլ թեկնածուներ առաջադրել, դա նույնպես ապօրինի կլինի, քանի որ պատգամավորի վերաբերյալ որոշման կայացման իրավասությունը պատկանում է խմբակցությանը, որին ներկայացնում է այդ պատգամավորը»,-ասաց ընդդիմադիր պատգամավորը:

Ինչ վերաբերում է հանձնաժողովի վաղը կայանալիք նիստին, Արծվիկ Մինասյանն ասաց, որ ընդդիմությունը դեռ որոշում չունի՝ կմասնակցի դրան, թե՞՝ոչ, քանի որ, նրա խոսքով, վաղվա նիստը ևս ապօրինի է.

«Շաբաթներ առաջ, երբ ընդդիմությունը նույն հանձնաժողովից արտահերթ նիստ էր պահանջում, հանձնաժողովի նախագահը առարկություն էր ներկայացնում, թե օրակարգում ներառված հարցի վերաբերյալ նախագիծ պետք է լինի , բայց տեսնում ենք, որ վաղվա նիստի համար էլ իրենք որևէ նախագիծ չեն ներկայացրել: Եթե նիստն ապօրինի է՝ ինչի՞ն մասնակցենք, նիստի օրակարգում ներառված հարցը նախագիծ չունի»:

Աղբյուր` Փաստինֆո