Փաստ ինֆո

Մեր թիվ մեկ նպատակը կապիտուլյանտից քաղաքական դաշտն ազատելն է, և մեր գործողությունները պետք է դիտարկել այդ պրիզմայով։ Մամուլի ասուլիսի ժամանակ այս մասին ասաց ԱԺ «Պատիվ ունեմ» խմբակցության քարտուղար Հայկ Մամիջանյանը։

Պատգամավորը նշեց, որ սեփական երկրից ու ժողովրդից չեն նեղանում, հետևաբար ընդդիմադիր դաշտի գործունեության հիմնական ոլորտը պետք է լինի մոլորյալ համաքաղաքացիներին յուրաքանչյուրին իր լեզվով բացատրել, թե ինչու այս իշխանություններն իրավունք չունեն ղեկավարել երկիրը։

Անդրադառնալով հայ-թուրքական երկխոսության գործընթացում ԱԺ փոխնախագահ Ռուբեն Ռուբինյանին որպես Հայաստանի ներկայացուցիչ նշանակելու հարցին՝ Հայկ Մամիջանյանը նկատեց՝ հայ-թուրքական հարաբերությունների տրամաբանությունը, որը տեսնում են այս իշխանությունները, անընդունելի են։

«Այն ժամանակ մենք գործընթացը կառուցում էին՝ անելու ամեն ինչ, որ Թուրքիան որպես դերակատար հանդես չգար ղարաբաղյան հիմնախնդրի տրամաբանության մեջ։ Այսինքն հանդես գար միայն իրեն հասանելիք կարգավիճակով, այն է՝ Մինսկի խմբի ընդամենը անդամ երկիր։ Դա կարծես հաջողվում էր։ Հիմա դատելով Թուրքիայի պաշտոնյաների հայտարարություններից՝ խիստ հակառակն է։ Թուրքիան պլանավորում է ակտիվ դերակատարում ունենալ ղարաբաղյան հիմնախնդրում, որը Հայաստանի համար պետք է անընդունելի լինի»,-ասաց Հայկ Մամիջանյանը՝ հավելելով, որ այս իշխանությունները դա չեն հասկանում։

Պատգամավորը նկատեց՝ հաշվի առնելով խորհրդարանական դիվանագիտության այն ժառանգությունը, որը Ռուբեն Ռուբինյանը թողել է այս գումարման ԱԺ-ին, կարելի էր նրան որպես ներկայացուցիչ նշանակելուց առաջ ավելի շատ մտածել։ Հայկ Մամիջանյանը նշեց, որ խնդիրը ոչ թե անձերն են, այլ տրամաբանությունը։

«Նիկոլ Փաշինյանի օրոք ցանկացած բանակցություն Հայաստանի համար վատ է ավարտվելու։ Յուրաքանչյուր նոր ճակատ, որը բացվում է, նույնիսկ եթե դա բարեկամական երկրի հետ լինի, խնդիրներ է առաջացնում։ Այդ անձն ունակ չէ պաշտպանել երկրի շահերը»,-ասաց Հայկ Մամիջանյանը։

Աղբյուր` Փաստինֆո