Փաստ ինֆո

«Հայաստան» խմբակցության պատգամավորներ Աննա Գրիգորյանը և Գեղամ Մանուկյանը ասուլիսի ընթացքում ներկայացրին 44-օրյա պատերազմից հետո Սյունիքում տեղի ունեցող գործընթացների ժամանակարգրությունը.

«Մեկ տարի առաջ ադրբեջանցիներն իրենց GPS սարքերով մոտենում են հայկական գյուղերին և ասում՝ սա մեր տարածքն է, GPS-ով գծում են մեր սահմանները։ Նիկոլ Փաշինյանը և կառավարության տարբեր ներկայացուցիչներ ասում էին՝ բանավոր փոխըմբռնման հիման վրա ադրբեջանական զորքերը առաջ են եկել: Մենք տարբեր հարցումներ ենք ուղարկել՝ Կառավարություն, ՊՆ, ԳՇ, ԱԱԾ՝ հասկանալու համար, թե ի՞նչ փաստաթղթի հիման վրա է Սյունիքում տեղի ունեցել  այդ  գործընթացները, սակայն մինչ օրս հստակ պատասխան չունեինք»,-ասաց Գրիգորյանը:

Գեղամ Մանուկյանն էլ հայտնեց, որ դեկտեմբերի 3-ին վերջապես ստացել են իրենց հարցման պատասխանը.

«Մենք փորձելու ենք ամեն բան փաստարկված ներկայացնել, քանի որ իշխանությունը քաղաքական հայտարարություններով խուսանավել է պատասխանել մի հարցի՝ ինչու՞ Սյունիքը դարձավ անպաշտպան»,-ասաց նա:

Գեղամ Մանուկյանը հիշեցրեց, որ նախորդ դեկտեմբերի 17-ին, այդ ժամանակ փոխվարչապետ Տիգրան Ավինյանն առաջին անգամ, խոսեց Սյունիքում զորքերի տեղաբաշխման մասին, իսկ Սուրեն Պապիկյանն էլ հաստատեց, որ ՊՆ նախարար Վաղարշակ Հարությունյանը գտնվում է Սյունիքում և զորքերի տեղակայում իրականացնում.

«Փետրվարին Հրանտ Բագրատյանը փաստաթուղթ հրապարակեց, որը մեծ աղմուկ բարձրացրեց, որևէ պետական հաստատություն չհաստատեց այդ փաստաթղթի գոյության փաստը, դեռ ավելին՝ փետրվարի 11-ին իշխանական պատգամավոր Սիսակ Գաբրիելյանն ասաց, թե ցանկացած մեկն էլ կարող է նման թուղթ տպել և հրապարակել: Ամիսներ շարունակ ԱԺ կամ կառավարության ներկայացուցիչները փակ հանդիպման ձևաչափով չեն խոսել մանրամասնությունների մասին»,-ասաց Մանուկյանը և հիշեցրեց, որ սեպտեմբերի 27–ին ԱԺ կառավարության հարցուպատասխանի ժամանակ Նիկոլ Փաշինյանը հաստատեց, որ Սյունիքում զորքերի հրաման ինքն է տվել:

Ընդդիմադիրների արձանագրմամբ՝ իշխանության ներկայացուցիչները մշտապես խուսափել են պատասխանել Սյունիքում տեղի ուենցող գործընթացների մասին։

Աղբյուր` Փաստինֆո