Փաստ ինֆո

Հայաստան-Թուրքիա երկխոսության գործընթացում Հայաստանի ներկայացուցչի հարցում առաջնահերթություն է տրվել ոչ թե պրոֆեսիոնալ, այլ վստահելի մարդ ընտրությանը, ինչը սխալ մոտեցում է։ «Փաստինֆո»-ի հետ զրույցի ժամանակ այս մասին ասաց միջազգայնագետ Սուրեն Սարգսյանը։

Հիշեցնենք, որ Հայաստան-Թուրքիա երկխոսության համար ՀՀ ներկայացուցիչ է նշանակվել ԱԺ փոխնախագահ Ռուբեն Ռուբինյանը։
Սուրեն Սարգսյանը նկատեց՝ հիմա խոսք է գնում հայ-թուրքական հարաբերությունների հիմնադրման մասին, ինչը պատմական փուլ է, և սխալ հիմնադրման փաստը կարող է լուրջ խնդիրներ ստեղծել մեր արտաքին քաղաքականության համար։

«Կարծում եմ՝ Թուրքիան մեզանից մաքսիմալ զիջումներ է պահանջելու և անհավասար նախապայմաններ է դնելու մեր առջև, իսկ մենք, ցավոք սրտի, որևէ նախապայման դնելու հնարավորություն չունենք։ Կարծում եմ՝ կլինեն ինչ-որ փաստաթղթեր, հայտարարություններ, համաձայնագրեր, որոնց վրա ըստ էության կհիմնադրվեն հայ-թուրքական հարաբերությունները։ Հաշվի առնելով դրանց բարդությունները, բարդ անցյալն ու ներկան, ինչպես հիմքը դրվի, այդպես էլ այդ հարաբերությունները կկառուցվեն»,-նշեց միջազգայնագետը։

Հարցին՝ ԱԺ փոխնախագահն իրավասություն ունե՞ր այս գործընթացում ներկայացուցիչ նշանակվել, Սուրեն Սարգսյանը նկատեց՝ այստեղ իրավասության խնդիր չկա, քանի որ ցանկացած պետություն ինքն է որոշում, թե ում նշանակի։ Խնդիրը պրոֆեսիոնալիզմի բացակայությունն է։

«Կցանկանայի՝ նշանակեին պրոֆեսիոնալ դիվանագետ, մարդու, որը հնարավորություն, փորձ ու գիտելիք է ունեցել տարբեր տարիներին հայ-թուրքական հարաբերությունների մեջ ներգրավվածության տեսանկյունից։ Դա կարող էր լինել ցանկացած նախկին արտգործնախարար, որն այս ոլորտում փորձ ու գիտելիք ուներ, բայց ցավոք սրտի առաջնահերթությունը տրվել է վստահությանը»,-ասաց Սուրեն Սարգսյանը։

Միջազգայնագետը կարծում է, որ Հայաստանը հնարավորություն չունի չենթարկվելու Թուրքիայի կողմից առաջ քաշվող նախապայմաններին։ Ավելին, Սուրեն Սարգսյանի խոսքով նախապայմաններից երկուսն արդեն իսկ բավարարվել են։ Խոսքը գնում է Արցախի հարցի մասին, որին այնպիսի լուծում է տրվել, ինչպիսին Թուրքիան էր ուզում տարիներ շարունակ։ Երկրորդ նախապայմանն էլ հայոց ցեղասպանության միջազգային ճանաչումից հրաժարվելն է, և ըստ էության հայկական կողմը դրանից հրաժարվել է, քանի որ արտաքին քաղաքական օրակարգում դա չկա։

Ինչ վերաբերում է հարցին, թե ո՞վ է Ռուբեն Ռուբինյանի վրա լրացուցիչ պարտավորություններ դնելու, Սուրեն Սարգսյանը նշեց, որ ուղիղ կապ կլինի վարչապետի հետ և հավանաբար հենց նա էլ կհամակարգի այդ ամենը։

«Կարծում եմ՝ ուրիշ որևէ մեկը ներգրավվածություն չի ունեն։ Միգուցե արտգործնախարարը մասնակցի ինչ-որ խորհրդատվական տեսանկյունից, բայց ցանկալի կլիներ ունենալ պրոֆեսիոնալների խումբ, թուրքագետների խումբ, որոնք ճանաչում են Թուրքիան, գիտեն Թուրքիայի քաղաքականությունը։ Ցավոք սրտի այս պահի դրությամբ նման տեղեկություն չունեմ»,-նշեց միջազգայնագետը

Աղբյուր` Փաստինֆո