Փաստ ինֆո

Հարցը, թե ինչո՞վ է պայմանավորված ժամկետից շուտ քաղաքապետի փոփոխության գնալու անհրաժեշտությունը, որ այս օրերին նախաձեռնել է իմքայլականների կորպուսը, համոզիչ փաստարկներ, ըստ էության չունի։ Իհարկե, ըստ երևանցիների՝ չունի, բայց ըստ քպականների՝ ունի, քանի որ իրենց թիմից անկախ է գործում։ 

Որպես փաստարկ մարդիկ առաջնահերթության կարգով նշում են այն, որ ներկա քաղաքապետը արդեն լավ է կարողանում կազմակերպել աղբահանությունը։ Նաև ասվում է, որ ավտոբուսային պարկն է համալրել նոր ավտոբուսներով։

Փաստ է այն, որ ազգի մեջ սևուսպիտակ բաժանարար գիծն առաջինը գծող քաղաքապետի ու նրա տեղակալի միջև ընտրություն պիտի կատարի ավագանին։

Իրականում ծիծաղելի ու ողբերգական մի վիճակում ենք հայտնվել, քանի որ ներկա իշխանության կատարած ու կատարվող ամեն ինչի հիմքում փաշինյանական քաջնազարականությունն է։ Ասում է՝ ճժե՛ր, էս կողմն անցեք, ուսապարկերն անցնում են, հետո թե՝ ճժե՛ր, հիմա էլ՝ էն կողմն անցեք, քայլականները զանգվածաբար պատրաստ կանգնած են․․․

Ընդհանրապես, Փաշինյանի կադրերի շրջանակում ընտրություն կատարելը շատ բարդ է, քանի որ բոլոր դեպքերում բախվում ես անընտրելիների հետ։

Խնդրեմ, առողջապահության ոլորտում տապալում արձանագրած նախարարը փնովում է Երևանի քաղաքապետի աշխատանքը, թե՝ վերջինս սինքրոն չի աշխատել կառավարության հետ, թե՝ դեռ պոլիկլինիկաներ կան, որ տնօրենները չեն փոխվել։ Մեկը հարցնի՝ իսկ փոխվածները ի՞նչ հաջողություն են արձանագրել, ինչո՞վ են աչքի ընկել, բացի նրանից, որ ձեր վերնախավի խնամի-ծանոթ-բարեկամներն են։ Ախր, ո՞նց կարող են սրանք գնահատել իրար, եթե մեկը մեկին արժեն։

Նկատելի է մեկ բան՝ իմքայլականները իրենցից ցանկացած մեկի ինքնուրույնության դրսևորում չեն կարողանում հանդուրժել։ Այսինքն, նրանց վարժեցրել են, որ կա Նիկոլն է, չկա՝ Նիկոլն է և նա է, որ պիտի որոշի՝ ով, ե՞րբ՝ ու՞ր պիտի գնա, պիտի գնա՞, թե՞ չգնա։

Հիմա մի ժամանակ է, երբ անկանխատեսելի Մարությանին նա ուզում է փոխարինել մեկ ուրիշով։
Ի դեպ, տեսակետը, որ քաղաքապետի թեմա բերելն այս օրերին շատ ավելի կարևոր թեմաներից հանրությանը շեղելու համար է արվում, շատերն են կիսում։

Այս համատեքստում ուշագրավ էր նախօրեին տեղի ունեցած՝ ՀՀԿ համագումարը, որն առավել կարևոր թեմաների մասին հիշեցրեց ժողովրդի զգալի մասին։ Հիշեցրեց նրանց կատարած ողբերգական ընտրության և անգամ պատերազմից ու պարտությունից հետո՝ իրենց ողբերգական ընտրությունը մեկ անգամ ևս ամրապնդելու մասին։

Այս ամենի համապատկերում այնքա՜ն երկրորդական է Երևանի քաղաքապետին նրա տեղակալով փոխելու թեման։ Բայց դե, իշխանությունն այսօր սահմանադրական փոփոխությունների հարցն է կարևորում, վարչապետականից նորից նախագահական կառավարման անցնելը, իսկ այս առումով, անկանխատեսելի և քաղպայմանագրից ըստ էության, անկախացած քաղաքապետից ազատվելու հարցը նույնպես կարևոր է դառնում։

Միայն թե՝ շատ վստահ թող չլինի իշխող թիմը, քանի որ ընտրությունը փակ-գաղտնի է։

Աղբյուր` Փաստինֆո