Փաստ ինֆո

Երևանի ավագանու «Իմ քայլը» խմբակցության անդամները խուսափում են հրապարակավ խոսել քաղաքապետ Հայկ Մարությանին անվստահություն հայտնելու պատճառների մասին, սակայն ոչ պաշտոնապես հայտնում են, որ ունեն մոտ 40 ստորագրություն՝ անհրաժեշտ 33-ի փոխարեն։ 

Երևանի ավագանու անդամներից մի քանիսի հետ վաղ առավոտից փորձեցինք կապ հաստատել։ Մասնավորապես՝ Լիլիթ Պիպոյանը, Սիփան Ասատրյանը, Արման Անտոնյանը համառորեն չեն պատասխանում հեռախոսազանգերին, իսկ ավագանու «Իմ քայլը» խմբակցության անդամ, երգիչ Արթուր Իսպիրյանը՝ հայտարարեց, որ ինքը հեռախոսով մեկնաբանություն չի տալիս։

«Փաստինֆո»-ին հաջողվեց կապ հաստատել ավագանու Իմ քայլը խմբակցության ղեկավար Արմեն Գալջյանի հետ, որը հրաժարվեց պատասխանել անգամ հարցին, թե քանի՞ ստորագրություն կա։ Հետաքրքրվեցինք, թե ինչ պատճառով են Հայկ Մարությանին անվստահություն հայտնել, Գալջյանը նշեց, որ պատճառների մասին հիմա մեկնաբանություն չի տա։ Հարցին՝ արդյոք նո՞ր է խմբակցությունը որոշելու, թե ինչո՞ւ են քաղաքապետին անվստահություն հայտնում, Գալջյանը նշեց.

«Ոչ, պարզապես այս պահին նպատակահարմար չեմ գտնում պատասխանելու։ Մի փոքր ավելի ուշ»։

Հարցին՝ արդյոք Գալջյան իր էջում է հայտարարելու պատճառների, ստորագրության ու մնացածի մասին, միանշանակ պատասխան չտվեց.

«Ամենայն հավանականությամբ գուցե իմ էջում, կամ առհասարակ էջերում չլինի, այլ կերպ հայտարարվի»։

Փորձեցինք հետաքրքրվել, թե այս պահին խմբակցությունը թեկնածու ունի՞, թե քաղաքապետին անվստահություն հայտնելուց հետո ում են տեսնում Երևանի քաղաքապետի պաշտոնում ավագանու Իմ քայլը խմբակցության ղեկավարը հայտնեց.

«Այո, կա տարբերակ, բայց այս պահին չեմ կարող ասել»։
Գալջյանը հայտնեց, որ ինքը չի կարող լինել այդ պաշտոնում,քանի որ 30 տարին լրացած չէ։ Արմեն Կոտոլյանը, ով նախօրեին առաջինը հայտնեց անվստահություն հայտնելու մասին ևս հայտնել է, որ ինքը չէ քաղաքապետի թեկնածուն ։ «Փաստինֆո»-ի տեղեկություններով՝ ՔՊ-ն քննարկում է քաղաքապետի տեղակալ Հրաչյա Սարգսյանի թեկնածությունը՝ քաղաքապետի պաշտոնում։

Հիշեցնենք, որ Հայկ Մարությանի և Նիկոլ Փաշինյանի լարված հարաբերությունների մասին վաղուց էինք հայտնել։ Ըստ «Փաստինֆո»-ին հասած տեղեկությունների՝ Մարությանն ու Փաշինյանը միմյանց նույնիսկ չեն բարևում։ Ավելին, օրերս տեղի ունեցած ավտոբուսների վարորդների բողոքի ակցիան, ըստ տեղեկությունների, ուղղորդված էր իշխանության կողմից՝ Հայկ Մարությանին «սևացնելու» համար։

Միայն երեկ՝ ուշ երեկոյան է ավագանու իշխող խմբակցության անդամ Արմեն Կոտոլյանը հայտարարեց քաղաքապետ Հայկ Մարությանին անվստահություն հայտնելու գործընթացի մասին։ Նա նաև տեղեկացրել է, որ ստորագրողներից մեկն էլ ինքն և կողմ է գործընթացին։

Աղբյուր` Փաստինֆո