Փաստ ինֆո

Երևանի ընդհանուր իրավասության դատարանը՝ դատավոր Արուսյակ Ալեքսանյանի նախագահությամբ, հեռացել է խորհրդակցական սենյակ՝ Մամիկոն Ասլանյանի խափանման միջոցի վերաբերյալ որոշում կայացնելու։

Փաստաբան Լուսինե Սահակյանը լրագրողների հետ զրույցում հայտնեց, որ քննիչը չկարողացավ հիմնավորել, որ Մամիկոն Ասլանյանի մեղադրանքը հիմնավոր է։

«Լավագույն քննիչն անգամ դա անել չէր կարող, որովհետև Մամիկոն Ասլանյանին մեղսագրվող արարքները հանցագործություն համարվել չեն կարող, Մամիկոն Ասլանյանը գործել է օրենքով սահմանված կարգով՝ իր լիազորությունների շրջանակներում՝ օրենքի տառին համապատասխան»,-նշեց փաստաբանը։

Նրա դիտարկմամբ՝ ակնհայտ միջամտություն է իրականացվում ընտրությունների ընթացքին։

«Նաև դատարանի առջև հարց ենք բարձրացրել, որ ժողովրդի իշխանության հարց գոյություն ունի։ ՀՀ Սահմանադրությամբ սահմանված է, որ ժողովուրդն իր իշխանությունն իրացնում է նաև տեղական ինքնակառավարման մարմիններում՝ ընտրելով համապատասխան պաշտոնատար անձանց և, որ պետությունում երաշխավորվում է ժողովրդի իշխանությանը և ոչ ոք իրավունք չունի միջամտելու։ Այս պարագայում ուղիղ միջամտություն է իրականացվում և հակասահմանադրական քայլեր են անում»,- ընդգծեց Սահակյանը՝ հավելելով, որ իշխանությունը ժողովրդի իշխանության դեմ է գնում նման քաղաքական հետապնդում իրականացնելով։

Նա փաստեց, որ Մամիկոն Ասլանյանին կալանավորելու հիմք չկա, որովհետև որպես հիմք բերված է խոչընդոտելու ռիսկը, մինչդեռ, քրեական գործը հարուցվել է երեք ամիս առաջ և, եթե խոչընդոտման ռիսկ լիներ, ապա դատարանում փաստեր կներկայացվեր։

Աղբյուր` Փաստինֆո