Փաստ ինֆո

Երևանի ընդհանուր իրավասության դատարանի դատավոր Դավիթ Արղամանյանը կշարունակի քննել ընդդիմադիր հասարակական-քաղաքական գործիչ Նարեկ Սամսոնյանի ձերբակալության իրավաչափության հարցը: «Փաստինֆո»-ի թղթակցի հաղորդմամբ՝ դատավոր Դավիթ Արղամանյանը մերժել է ինքնաբացարկի միջնորդությունը և այժմ քննում է Սամսոնյանին ձերբակալելու որոշման դեմ բողոքը:

Նշենք, որ Նարեկ Սամսոնյանի պաշտպան Ռուբեն Մելիքյանը «Փաստինֆո»-ի թղթակցի հետ զրույցում հայտնել էր, որ դատավոր Արղամանյանին ինքնաբացարկի միջնորդություն էր ներկայացվել, որի հիմքում դրվել էր դատավորի քաղաքական կողմնորոշումը։

Ինչպես նշեց Ռ.Մելիքյանը՝ Նարեկ Սամսոնյանը հայտնի է որպես իշխանությունների ընդդիմախոս, այս պահին ևս ունի դատական վեճ Նիկոլ Փաշինյանի ընտանիքի անդամների հետ, մինչդեռ Արղամանյանը մինչ դատավոր դառնալը եղել է ՔՊ կուսակցության անդամ, ինչպես նաև՝ Սուրեն Պապիկյանի օգնականը, մշտապես ֆեյսբուքյան գրառումներով աջակցություն է հայտնել իշխանություններին, հետևաբար, Դավիթ Արղամանյանը չի կարող քննել Սամսոնյանի գործը: Բացի այդ, Մելիքյանն արձանագրել էր, որ դատավոր Արղամանյանին ներկայացված ինքնաբացարկի միջնորդությունը հատկապես արդիական է դատավոր Զարուհի Նախշքարյանի վերաբերյալ ԲԴԽ որոշումից հետո, որով ԲԴԽ-ն գտել է, որ, օրինակ դատարանների մուտքերը քննադատելը հիմք է, որ Նիկոլ Փաշինյանի նկատմամբ դատավորը չդիտվի որպես անկողմնակալ:

Դատարանը մերժել է ինքնաբացարկի միջնորդությունը և քննել ձերբակալման իրավաչափության հարցը: Բողոքի քննությունն, ըստ էության, ավարտվել է: Երևանի ընդհանուր իրավասության դատարանը՝ դատավոր Դավիթ Արղամանյանի նախագահությամբ, հեռացել է խորհրդակցական սենյակ՝ որոշում կայացնելու: Դատարանի որոշումը կհրապարակվի վաղը:

Հիշեցնենք, որ Նարեկ Սամսոնյանը ձերբակալվել է երեկ՝ «Լուսավոր Հայաստան» կուսակցության անդամ Դավիթ Խաժակյանի հաղորդման հիման վրա՝ ծանր վիրավորանքի հատկանիշներով հարուցված քրեական գործի շրջանակներում: Հատկանշական է, որ սույն հոդվածը չի սահմանում որպես պատիժ ազատազրկում:

Հեղինակ՝ Իզաբել Սահակյան

Աղբյուր` Փաստինֆո